Presidenti i SHBA-së, Donald Trump pritet të shpallë dhe të nënshkruajë sot zyrtarisht statutin e Bordit të Paqes gjatë një ceremonie në Davos të Zvicrës, transmeton Anadolu.
Ceremonia është planifikuar të fillojë në orën 09:30.
Iniciativa, fillimisht e konceptuar si një mekanizëm për të mbikëqyrur armëpushimin e Gazës dhe rindërtimin pas luftës, që atëherë është zgjeruar në një organ më të gjerë ndërkombëtar për ndërmjetësimin e konflikteve, me dhjetëra vende të ftuara për t’u bashkuar.
I dërguari special i SHBA-së, Steve Witkoff tha të mërkurën se më shumë se 20 vende e kishin pranuar tashmë ftesën. “Mendoj se kemi rreth 20, ndoshta 25 udhëheqës botërorë që e kanë pranuar tashmë”, tha ai në një intervistë me CNBC.
Midis vendeve që e kanë pranuar ftesën janë Izraeli, Arabia Saudite, Emiratet e Bashkuara Arabe, Bahreini, Jordania, Katari dhe Egjipti si dhe anëtarët e NATO-s, Turqia dhe Hungaria.
Shtetet e tjera pjesëmarrëse përfshijnë Marokun, Pakistanin, Indonezinë, Kosovën, Kazakistanin, Uzbekistanin, Vietnamin, Argjentinën, Armeninë, Azerbajxhanin dhe Bjellorusinë.
Javën e kaluar, Shtëpia e Bardhë njoftoi formimin e Bordit të Paqes, së bashku me miratimin e një Komiteti Kombëtar për Administrimin e Gazës, një nga katër organet e caktuara për të menaxhuar fazën kalimtare në enklavë. Krijimi i bordit përkoi me nisjen e fazës së dytë të një marrëveshjeje armëpushimi, e cila ndaloi luftën e Izraelit në Gaza që ka vrarë më shumë se 71 mijë palestinezë dhe ka plagosur mbi 171 mijë të tjerë që nga tetori i vitit 2023.
Bordi, që ka të ngjarë të ketë Trumpin si kryetar të përjetshëm, pritet të funksionojë si një organizatë ndërkombëtare për ndërtimin e paqes, me një mandat që shtrihet përtej Gazës. Zyrtarët e Shtëpisë së Bardhë thanë se vendeve të ftuara iu tha se anëtarësimi i përhershëm në bord do të kërkonte kontribut prej të paktën 1 miliard dollarësh brenda vitit të parë.
Sipas draftit të kartës, vendeve anëtare fillimisht do t’u jepej një mandat trevjeçar, ndërsa vendet e përhershme do të rezervoheshin për ata që marrin angazhimin financiar.
Franca, Norvegjia dhe Suedia kanë refuzuar publikisht të bashkohen me iniciativën, duke përmendur shqetësimet se kjo mund të minonte rolin e OKB-së. Vende të tjera evropiane, përfshirë Gjermaninë, Mbretërinë e Bashkuar dhe Italinë, nuk kanë marrë përsipër asnjë angazhim.
Pritet që Komiteti ekzekutiv që mbikëqyr Bordin e Paqes të përfshijë ish-kryeministrin britanik, Tony Blair, sekretarin e Shtetit të SHBA-së Marco Rubio, të dërguarin special Steve Witkoff, dhëndrin e Trumpit, Jared Kushner, miliarderin Marc Rowan, kreun e Grupit të Bankës Botërore, Ajay Banga dhe këshilltarin politik të SHBA-së, Robert Gabriel.
