“Do të ketë shumë veprime pozitive! Do të fitohen shumë para. Irani mund të fillojë procesin e rindërtimit”, thotë presidenti amerikan Trump
Presidenti amerikan Donald Trump tha sot se SHBA-ja do të ndihmojnë me rritjen e trafikut në Ngushticën e Hormuzit, pas një armëpushimi dyjavor të sapo dakorduar me Iranin, transmeton Anadolu.
“Do të ketë shumë veprime pozitive! Do të fitohen shumë para. Irani mund të fillojë procesin e rindërtimit”, tha ai në platformën e tij Truth Social.
“Ne do të ngarkohemi me furnizime të të gjitha llojeve dhe thjesht do të presim për t’u siguruar që gjithçka të shkojë mirë”, shtoi Trump.
Para se të njoftonte të martën se kishte rënë dakord të pezullonte bombardimet dhe sulmet ndaj Iranit për një periudhë dyjavore, Trump i dha Iranit afat deri në orën 8 të mbrëmjes sipas Orës Lindore për të rihapur Ngushticën e Hormuzit dhe për të arritur marrëveshje ose Irani do të përballej me sulme ndaj infrastrukturës së tij energjetike.
Ai e përshkroi momentin si një “Epokë të Artë të Lindjes së Mesme” të mundshme dhe sinjalizoi angazhimin e vazhdueshëm të SHBA-së për të siguruar rrugën jetësore detare.
Tensionet rajonale janë përshkallëzuar që kur SHBA-ja dhe Izraeli nisën ofensivë të përbashkët kundër Iranit më 28 shkurt, duke vrarë më shumë se 1.400 njerëz deri më sot, përfshirë ish-liderin suprem, Ali Khamenei.
Irani është hakmarrë me sulme me dronë dhe raketa që synojnë Izraelin si dhe Jordaninë, Irakun dhe vendet e Gjirit që strehojnë asete ushtarake amerikane. Ai gjithashtu ka kufizuar lëvizjen e anijeve përmes Ngushticës së Hormuzit.
