Znj. Emine Erdogan, zonja e parë e Turqisë, paralajmëroi se miliona gra dhe fëmijë të privuar nga të drejtat themelore janë një kujtesë e qartë për deficitin në drejtësi në botë. Ajo mbajti fjalimin e saj të premten përmes video mesazhit në Sierra Leone, në programin “Ndërtimi i Reziliencës tek Gratë dhe Vajzat Kundër Ndryshimeve Klimatike dhe Konflikteve”.
Erdogan theksoi se gratë duhet të jenë në qendër të përpjekjeve për paqe dhe reziliencë ndaj klimës, duke vlerësuar udhëheqjen e fuqishme të zonjës së parë të Sierra Leones, Fatima Maada Bio, për punën e saj në mbrojtje të grave dhe fëmijëve. Ajo nënvizoi gjithashtu sfidat globale si ndryshimet klimatike, thatësirat dhe rritjen e nivelit të detit, që godasin shoqëritë pavarësisht zhvillimit të tyre.
Ajo tha se më shumë se 120 konflikte në mbarë botën po e lodhin njerëzimin dhe “po e shtyjnë drejt një pikë kthese”, ku gratë dhe fëmijët paguajnë çmimin më të rëndë. Vetëm gjatë vitit 2024, 676 milion gra dhe fëmijë u detyruan të jetojnë në zonat e konfliktit, ndërsa numri i grave të vrara në luftë gjatë dy viteve të fundit është dyfishuar krahasuar me periudha të mëparshme.
Erdogan paralajmëroi se deri në vitin 2050, rreth 158 milion gra pritet të futen në varfëri ekstreme për shkak të ndikimeve të krizës klimatike. Ajo theksoi se ekzistenca e miliona grave dhe fëmijëve që luftojnë për mbijetesë pa të drejta bazë, si e drejta për jetën, siguria ushqimore, akses në ujë të pastër dhe edukim, është arsyeja kryesore që bota dështon në drejtësi.
Zonja e parë nënvizoi se gratë duhet të jenë “aktorë qendrorë” në ndërtimin e një bote të drejtë dhe të begatë, duke mos pritur vetëm ndihmë në krizave humanitare, por duke qenë pjesëmarrëse aktive në gjetjen e zgjidhjeve. Ajo theksoi se përfshirja e grave në parlament dhe në ndërtimin e paqes rrit mundësinë e miratimit të marrëveshjeve mjedisore dhe ul mundësinë e dhunës deri në 24%.
Sipas Erdogan, vendet ku gratë kanë status më të lartë social dhe politik shënojnë 12% ulje të emetimeve të karbonit, ndërsa gratë përbëjnë gjysmën e fuqisë punëtore bujqësore dhe me akses të barabartë në burime mund të reduktojnë urinë globale deri në 17%.
Ajo përfundoi me një thirrje për solidaritet global dhe shprehu shpresën se iniciativa që vjen nga Afrika do të frymëzojë bashkëpunim ndërkombëtar për të transformuar jetën e grave dhe fëmijëve në mbarë botën, duke u dëshiruar njerëzve një vit të ri me paqe të qëndrueshme dhe një të ardhme të qëndrueshme. /mesazhi
