Një breshëri raketash u lëshua nga Libani jugor drejt Galilesë në Izraelin verior, transmeton Anadolu.
“Gjuajtja e rëndë e raketave u drejtua drejt Galilesë, së bashku me disa sirena që u aktivizuan mes shqetësimeve të depërtimit të avionëve në territorin izraelit”, njoftoi e përditshmja izraelite Maariv, duke shtuar: “Sirenat janë aktivizuar në komunitetet Dafna, Snir, Hagoshrim, Dan dhe vendbanime të tjera”.
Sipas Maariv, më shumë se 40 raketa u lëshuan nga Libani drejt Galilesë.
Më vonë, grupi libanez Hezbollah njoftoi në një deklaratë se kishte goditur Izraelin verior me dhjetëra raketa Katyusha që shënjestronin pozicionet e artilerisë.
Ushtria izraelite raportoi të premten se rreth 50 raketa u lëshuan nga Libani jugor drejt zonës së Galilesë në veri të Izraelit, sipas autoritetit izraelit të transmetimit.
Transmetuesi zyrtar tha se ushtria zbuloi një numër të madh raketash të lëshuara nga Libani jugor dhe se ato u neutralizuan nga sistemi Iron Dome, ndërsa nuk raportohet për të lënduar apo dëme.
Tensioni kufitar vjen në mes të një ofensive ushtarake izraelite në Rripin e Gazës pas një sulmi të 7 tetorit nga grupi palestinez Hamas, ku sipas autoriteteve izraelite u vranë rreth 1200 persona. Ushtria izraelite që atëherë ka vrarë më shumë se 33.600 njerëz dhe ka plagosur mbi 76 mijë të tjerë.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në janar urdhëroi Tel Aviv-in të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
