Në raportin ditor të Policisë së Kosovës janë raportuar dy raste të dyshuara të vetëvrasjes.
Rastet janë raportuar në Graçanicë dhe Ferizaj, të shtunën.
Rasti i parë ka ndodhur në Graçanicë, ku policia ka marrë informatën që një person është pa shenja jete.
Në vendin e ngjarjes, kanë dalë njësitë adekuate policore, ku kanë gjetur viktimën, i cili dyshohet se ka bërë vetëvrasje.
Gjithashtu, në vendin e ngjarjes njësitë policore kanë bërë të ditur se kanë gjetur dhe konfiskuar një pistoletë dhe një gëzhojë të cal-9mm, me të cilën dyshohet se ka kryer vetëvrasje.
“Ekipi mjekësor ka konstatuar vdekjen e viktimës, ndërsa me vendim të prokurorit, trupi i pa jetë i viktimës është dërguar në IML për obduksion. Rasti duke u hetuar”, thuhet në njoftimin e Policisë së Kosovës.
Ndërsa, rasti i dytë i raportuar, ka ndodhur në Ferizaj, ku nga raporti i Qendrës Klinike Universitare të Kosovës (QKUK) thuhet se një person është sjellë në gjendje të rëndë shëndetësore e i cili më pas ka vdekur.
“Me vendim të prokurorit trupi i pa jetë i viktimës është dërguar në IML për obduksion”, thuhet në raportin ditor të PK-së.
