Ford në Amerikën e Veriut do të zvogëlojë sasinë e prodhimit të kamionçinës F-150 javën e ardhshme për shkak të krizës së vazhdueshme të furnizimit me “mikroçipë”, gjë që tanimë ka prekur prodhuesit e automobilave në të gjithë globin.
Raportet në mediat amerikane thonë se Fabrika e Fordit në Kanada dhe Fabrika e Kansas City në Misuri do të mbyllen javën e 30 gushtit.
Raportet thonë se Ford gjithashtu do të shkurtojë dy nga tre ndërrime javën e ardhshme në fabrikën e saj të kamionëve Dearborn në Michigan, e cila prodhon F-150.
“Ekipet tona vazhdojnë të shfrytëzojnë në maksimum shpërndarjen tonë të disponueshme të mikroçipëve, duke gjetur zgjidhje unike për të ofruar sa më shumë automjete me cilësi të lartë për shitësit dhe klientët tanë”, tha kompania në një deklaratë.
Kamionçina Ford F-150 është një linjë modeli shumë fitimprurëse për Ford, kështu që kufizimet e prodhimit – në një kohë të kërkesës së lartë në SHBA – kanë një domethënie të rëndësishme. /Telegrafi/
