Pak pas orës 9 të mëngjesit të së shtunës, pranë bustit të Skënderbeut, nga pjesëtarë të Forcës së Sigurisë së Kosovës u vendos arkivoli i Adem Demaçit.
Kështu nisi ceremonia komemorative për varrosjen e veprimtarit Demaçi, e në nderim të tij, u mblodhën një numër jo i vogël i qytetarëve nga të gjitha trevat shqiptare, raporton KTV.
Ndërkohë erdhën edhe liderë të vendit, e nga rajoni në ceremoni morri pjesë edhe presidenti i Shqipërisë, Ilir Meta.
Pas himnit shtetëror e atij kombëtar, u mbajt një minutë heshtjeje.
“Qëndresa e tij e bëri simbol të lirisë kombëtare”, tha presidenti Hashim Thaçi në fjalën e tij.
Fjalë rasti në ceremoni kanë mbajtur edhe kryeministri Haradinaj dhe kryetari i BDI-së, Ali Ahmeti.
E vajza e Demaçit, Abetarja, tregoi për disa prej fjalëve të babait të saj të ndjerë pas sëmundjes.
Rreth orës 12:00, në varrezat e dëshmorëve në lagjen “Velania” të kryeqytetit, u soll arkivoli i Demaçit.
Mijëra qytetarëve të mbledhur, me një fjalë rasti, iu drejtua Selatin Novosella, bashkëveprimtar i Adem Demaçit.
Pasi liderët vendosën kurora lulesh në varrin e Demaçit, ngjashëm kanë bërë edhe qindra qytetarë që erdhën për të shprehur nderimin për veprën e tij.
Adem Demaçi, që shpesh i quajtur edhe “Masndela i Kosovës”, vdiq të enjten në moshën 82-vjeçare.
Përcjellja për në “Varrezat e Dëshmorëve” kaloi me disa incidente
I mbuluar me flamur kombëtar, arkivoli i Adem Demaçit është përcjellë nga garda kombëtare nga sheshi Skënderbeu për në varrezat e dëshmorëve në lagjen Velania të Prishtinës.
Qytetarët e shumtë thanë se Kosova e ka humbur një njeri të madh dhe të gjithë duhet ta ndjekin rrugën e tij, raporton KTV.
I nxehti dhe lëvizja e ngadaltë e veturës, që po e bartte trupin e pajetë të Demaçit,bëri që ajo të prishet jo shumë larg varrezave.
Por Forca e Sigurisë së Kosovës u mobilizua shumë shpejtë dhe pjesëtarët e saj arkivolin e mbajtën në duar deri te varrezat.
Por gjatë ceremonisë së varrimit, ekipi i mjekëve i Urgjencës në Prishtinë ua dha ndihmën e parë 2 personave.
I kontaktuar nga KTV-ja, Bujar Gashi, drejtor i Urgjencës në Prishtinë, ka thënë se dy të alivanosurit nuk kanë pasur nevojë për trajtim të mëtutjeshëm por kanë marrë këshillat e duhura nga ekipi i mjekëve.
Sipas tij, i nxehti dhe qëndrimi në këmbë iu kanë shkaktuar telashe shëndetësore dy të pranishmëve.
