Ish-kreu i juntës ushtarake të Mianmarit, Min Aung Hlaing, u zgjodh presidenti i 11-të i vendit sot pasi fitoi më shumë se gjysmën e votave në parlament, transmeton Anadolu.
Ligjvënësit në Parlamentin e Unionit në kryeqytetin Nay Pyi Taw mbështetën Min-in 69-vjeç, duke siguruar fitoren e tij në zgjedhjet presidenciale, raportoi agjencia kineze e lajmeve Xinhua.
Min shërbeu si komandant i përgjithshëm i forcave të armatosura, të njohura si Tatmadaw, nga viti 2011 deri kur dha dorëheqjen në mars për të kandiduar për presidencën. Ai u pasua nga ish-shefi i inteligjencës Ye Win Oo, i cili mori detyrën më herët këtë javë.
Min ka qeverisur në mënyrë efektive Mianmarin që kur udhëhoqi një grusht shteti ushtarak në vitin 2021 që rrëzoi qeverinë e zgjedhur të Aung San Suu Kyi. Marrja e pushtetit çoi në shpërbërjen e partisë së saj, Lidhja Kombëtare për Demokraci, dhe intensifikoi luftën civile në vazhdim.
Pas pesë vitesh në pushtet, Min mbikëqyri një proces zgjedhor me tri faza që filloi në fund të dhjetorit dhe përfundoi me fitore për partitë proushtarake, përfshirë Partinë e Solidaritetit dhe Zhvillimit të Unionit. Parlamenti i ri mbajti seancën e tij të parë më 16 mars.
Gjatë mandatit të tij si shef ushtarak, Mianmari u përball me dënim ndërkombëtar për persekutimin e pakicës Rohingya. Një fushatë ushtarake e nisur në vitin 2017 detyroi më shumë se 1 milion Rohingya të largoheshin drejt Bangladeshit fqinj.
Në nëntor 2024, prokurori i Gjykatës Penale Ndërkombëtare, Karim Khan, kërkoi urdhër arresti për Min-in, duke thënë se ekzistonin “baza të arsyeshme për të besuar” se ai mban përgjegjësi për krime kundër njerëzimit, përfshirë dëbimin dhe persekutimin e Rohingyave.
Në vitin 2019, Gambia paraqiti një çështje në Gjykatën Ndërkombëtare të Drejtësisë duke akuzuar Mianmarin për gjenocid ndaj Rohingyave, një çështje që në atë kohë u mbrojt nga liderja e atëhershme Aung San Suu Kyi.
