Siç raporton rrjeti mediatik “CNN”, familja e tij e njoftoi vdekjen e 84-vjeçarit Powell përmes medias sociale.
“Ish-sekretari amerikan i Shtetit dhe ish-shefi i Shtabit, gjenerali Colin L. Powell, vdiq këtë mëngjes si pasojë e komplikimeve nga COVID-19. Ne humbëm një bashkëshort, baba dhe gjysh të mrekullueshëm e të dashur dhe një amerikan të madh”, shkroi familja e tij në një postim në “Facebook”.
Familja theksoi gjithashtu se Powell kishte marrë dy doza vaksine kundër llojit të ri të koronavirusit.
I lindur më 5 prill 1937, në Nju-Jork të Shteteve të Bashkuara të Amerikës, Colin Powell u emërua sekretar 65. i Shtetit më 20 janar 2001. Ai e drejtoi diplomacinë amerikane deri më 26 janar 2005.
Powell ishte i pari afroamerikan që mbajti postin e shefit të Shtabit të Përgjithshëm, para se të bëhej kryediplomat nën presidencën republikane të George W. Bush.
