Federata Italiane dhe ajo Turke kanë çuar ofertën te shtëpia e futbollit evropian UEFA, për të organizuar së bashku Kampionatin Evropian 2032.
Italia dhe Turqia synojnë të organizojnë së bashku EURO 2032 dhe i kanë dërguar një kërkesë zyrtare UEFA-s, siç u konfirmua nga Federata italiane dhe Trupi Drejtues Evropian i Futbollit të premten.
FIGC kishte nisur tashmë ofertën e vet për të organizuar Evropianin, prillin e kaluar, duke zbuluar se lojërat do të zhvillohen në Milano , Torino, Verona , Genoa , Bolonja , Firence, Romë, Napoli, Bari dhe Cagliari.
Me deklaratën e sotme, FIGC tha se vendet do të zbuloheshin më vonë nëse UEFA pranonte ofertën e tyre të përbashkët me Turqinë.
“Është një kthesë historike që synon të vlerësojë futbollin kontinental,” tha presidenti i FIGC, Gabriele Gravina.
“Përveç afrimit të dy realiteteve të konsoliduara në panoramën e futbollit europian, ky projekt rrit vlerat e miqësisë dhe bashkëpunimit, duke përfshirë dy botë me rrënjë të thella historike që, gjatë mijëvjeçarëve, kanë kontaminuar njëra-tjetrën, duke ndikuar ndjeshëm në historinë e Evropës Mesdhetare. Futbolli dëshiron të jetë një urë ideale për të ndarë pasionet dhe emocionet që lidhen me sportin.”
UEFA gjithashtu lëshoi një deklaratë të premten pasdite pas marrjes së kërkesës nga Italia dhe Turqia.
“UEFA tani do të punojë me FIGC dhe TFF për të siguruar që dokumentacioni që do të dorëzohet për ofertën e tyre të përbashkët është në përputhje me kërkesat e tenderit”, thuhet në deklaratën e UEFA-s.
“Nëse oferta e përbashkët përputhet me këto kërkesa, ajo do t’i dorëzohet Komitetit Ekzekutiv të UEFA-s në takimin e planifikuar më 10 tetor, ku do të bëhen emërimet për 2028 dhe 2032. Vendimet për vendet dhe oraret e ndeshjeve do të merren në një fazë të mëvonshme.”
