Ambasadori i Izraelit në OKB, Danny Danon, deklaroi para gazetarëve se pas armëpushimit, diplomacia është e pashmangshme: “Do të duhet të flasim, të negociojmë dhe të sigurohemi që të mos rikthehemi në situatën ku ishim 12 ditë më parë, me një kërcënim madhor në Lindjen e Mesme.”
Ai theksoi se, edhe pse është herët për të vlerësuar plotësisht efektin e sulmeve ndaj objekteve bërthamore iraniane, “ne e dimë që arritëm ta zmbrapsim programin dhe të eliminojmë kërcënimin e menjëhershëm.”
Sa i përket thirrjeve për një armëpushim në luftën Izrael-Hamas në Gaza, Danon u shpreh se Izraeli shpreson të rifillojë negociatat mbi propozimin për armëpushim të paraqitur nga i dërguari amerikan për Lindjen e Mesme, Steve Witkoff.
Ai shtoi se është i bindur që aftësia e Izraelit për të përballuar kërcënimet gjatë konfliktit do t’i nxisë vende të tjera të normalizojnë marrëdhëniet me shtetin hebre.
Në përgjigje të një pyetjeje, Danon tha: “Mendoj se presidenti Trump e meriton Çmimin Nobel për Paqe.” /mesazhi
