Të paktën 72 palestinezë janë vrarë nga forcat izraelite që nga mëngjesi i së mërkurës në Rripin e Gazës, përfshirë 29 persona që ishin duke pritur për ndihma ushqimore, njoftojnë burime shëndetësore palestineze.
Sulmi më i fundit ndodhi në rrugën Salah al-Din pranë korridorit Netzarim, ku u qëlluan civilë që prisnin ndihma. Mbi 100 persona të tjerë u plagosën.
Në një tjetër sulm ajror në lagjen Zeitoun, u vranë 8 persona. Po ashtu, 8 civilë u vranë në kampin e zhvendosurve në al-Mawasi, përfshirë një grua dhe dy fëmijë. Sulme të tjera u raportuan në kampin Maghazi, ku u vranë 10 anëtarë të një familjeje.
Grupi Hamas dënoi sulmet ndaj zonave të banuara dhe pikave të ndarjes së ndihmave, duke i cilësuar si krime lufte dhe pjesë të një “lufte shfarosjeje”.
Ushtria izraelite tha për agjencinë Reuters se po shqyrton raportimet për viktimat.
Më vonë gjatë ditës, gazetarët në terren raportuan se trupat e 20 palestinezëve të vrarë në veri të Gazës ishin lënë në rrugë për pesë ditë para se të jepej leja për nxjerrjen e tyre.
Fondacioni Humanitar i Gazës (GHF), i mbështetur nga Izraeli dhe SHBA, ka nisur ndarjen e kufizuar të ndihmave në fund të majit, pas një bllokade totale gati 3-mujore. Megjithatë, OKB dhe organizatat e tjera ndërkombëtare kanë refuzuar të bashkëpunojnë me GHF, duke ngritur shqetësime për ndikimin ushtarak në shpërndarjen e ndihmave.
Një qytetar palestinez, Ahmed Ghaben, tha për Al Jazeera: “Djali i nipit tim shkoi për të marrë një thes miell për fëmijët, por u kthye i pajetë. Ai nuk ishte luftëtar, shkoi nga uria.”
Sipas raportimeve nga Deir el-Balah, dëshmitarët thonë se forcat izraelite përdorën dronë, tanke dhe snajperë kundër civilëve të paarmatosur.
Vetëm të martën, 70 palestinezë të tjerë u vranë ndërsa përpiqeshin të merrnin ndihma. Ministria e Shëndetësisë e Gazës raportoi se që nga fundi i majit, janë vrarë 397 persona dhe mbi 3,000 janë plagosur gjatë shpërndarjes së ndihmave.
Ndërkohë, numri total i viktimave që nga tetori 2023 ka arritur në 55,637 të vrarë dhe 129,880 të plagosur.
Ministria paralajmëroi gjithashtu për mungesë kritike të karburantit në spitale, duke theksuar se shumë qendra shëndetësore janë në rrezik mbylljeje për shkak të mungesës së energjisë.
Në një deklaratë nga Jemeni, lideri Houthi Mahdi al-Mashat theksoi se mbështetja për Gazën do të vazhdojë deri në fundin e agresionit dhe heqjen e bllokadës. /mesazhi
