Japonia shprehu “shqetësim serioz” për operacionet ushtarake të Izraelit në Liban, në të cilat deri tani janë vrarë qindra njerëz dhe rreth një milion janë zhvendosur, duke bërë thirrje për ndërprerje të luftimeve, transmeton Anadolu.
Tokio bëri thirrje “fuqishëm” që të respektohen sovraniteti dhe integriteti territorial i Libanit, thuhet në një deklaratë të Ministrisë së Punëve të Jashtme të Japonisë.
Ushtria izraelite ka intensifikuar sulmet në Liban që nga e mërkura, duke vrarë të paktën 303 persona dhe duke plagosur 1.150 të tjerë, sipas Mbrojtjes Civile libaneze.
Ofensiva e zgjeruar izraelite në Liban që nga 2 marsi ka vrarë 1.888 persona dhe ka plagosur 6.092 të tjerë, sipas Ministrisë së Shëndetësisë së Libanit.
Ministria e Jashtme e Japonisë tha se sulmet ndaj personelit të Kombeve të Bashkuara janë “të papranueshme” dhe dënoi të gjitha kërcënimet ndaj sigurisë së Forcës së Përkohshme të OKB-së në Liban (UNIFIL).
Tre paqeruajtës indonezianë të UNIFIL-it u vranë gjithashtu në vend në mars.
“Për të parandaluar përkeqësimin e mëtejshëm të situatës, Japonia bën thirrje për ndërprerje të menjëhershme të luftimeve midis Izraelit dhe Hezbollahut dhe u kërkon fuqishëm të gjitha palëve të respektojnë të drejtën ndërkombëtare, përfshirë të drejtën ndërkombëtare humanitare, dhe të zbatojnë plotësisht rezolutat përkatëse të Këshillit të Sigurimit të OKB-së, përfshirë Rezolutën 1701”, thuhet në deklaratë.
Japonia gjithashtu bëri thirrje për përmbajtje maksimale dhe përpjekje të sinqerta për një zgjidhje diplomatike, për të “parandaluar përshkallëzim të mëtejshëm”.
