Kthesa vdekjeprurëse e klimës mund të ndihet më shpejt se sa parashikohej
Ngjarjet ekstreme të motit që zakonisht lidhen me ngrohjen e skajshme globale mund të shfaqen edhe nëse rritja e temperaturës kufizohet në dy gradë Celsius.
Një studim i ri thekson se përmbytjet vdekjeprurëse në qytete, zjarret shkatërruese në pyje dhe thatësirat katastrofike në rajonet kryesore bujqësore mund të godasin më shpesh sesa mendohej më parë në një skenar ku temperaturat stabilizohen në rreth dy gradë Celsius mbi nivelet paraindustriale.
Sipas autorit kryesor të studimit, Emanuele Bevacqua, rezultatet tregojnë se ndikimet në sektorë veçanërisht të rëndësishëm shoqërisht mund të jenë të rënda edhe nën një ngrohje të moderuar.
Studiuesit analizuan pesëdhjetë modele klimatike, të njëjtat që përdor Paneli Ndërqeveritar për Ndryshimet Klimatike (IPCC). Ndryshe nga raportet e zakonshme që bazohen në mesataret e llogaritura, ky studim eksploroi modelet veçmas për të identifikuar gamën e rezultateve të mundshme.
Ekipi u përqendrua në tre sektorë të ndjeshëm: zonat me popullsi të dendur, rajonet prodhuese të drithit dhe pyjet. Rezultatet e botuara në revistën “Nature” tregojnë se ngrohja prej dy gradë Celsius mund të shkaktojë ngjarje klimatike që ndryshojnë shumë në intensitet.
Në zonat urbane, reshjet mund të rriten me katër deri në pesëmbëdhjetë për qind, duke shkaktuar përmbytje masive për shkak të kapaciteteve të kufizuara të kullimit. Skenarët më të këqij për këto zona ishin më ekstremë se sa pritej nën një ngrohje prej tre gradë Celsius, veçanërisht në Indi dhe Afrikën Qendrore.
Sa i përket bujqësisë, rreth një në katër modele treguan se thatësirat nën ngrohjen prej dy gradë Celsius mund të jenë po aq të rënda sa ato që priten në skenarin e rritjes me katër gradë Celsius. Rajonet më të prekura përfshijnë nënkontinentin Indian, Azinë Lindore dhe Amerikën Veriore Qendrore.
Ndërkohë, në rajonet pyjore ekziston probabiliteti një në pesë që moti që favorizon zjarret të bëhet po aq intensiv sa në ngrohjen prej tre gradë Celsius, duke rrezikuar rezervuarët kritikë të karbonit në Kanada, Rusi dhe Amazonë.
Edhe pse mundësia që këto rezultate ekstreme të ndodhin nën dy gradë Celsius është e ulët, studiuesit theksojnë se ato duhen marrë parasysh për planifikimin e masave adaptuese.
Përqendrimi vetëm te mesataret e modeleve mund të krijojë një ndjenjë të rreme sigurie. Këto gjetje përforcojnë urgjencën për të kufizuar ngrohjen globale shumë nën dy gradë Celsius për të shmangur surprizat e këqija që mund të sjellë natyra.
Ekspertët sugjerojnë se krahas reduktimit të emetimeve, politikat më të mira për menaxhimin e ujit mund të zbusin disa nga pasojat në sektorin e prodhimit të të korrave. /tesheshi
