Qasje më e balancuar ndaj Kosovës dhe Serbisë për çështjen e veriut është kërkuar nga Bashkimi Evropian, prej disa liderëve të vendeve anëtare në samitin e liderëve që ka përfunduar të premten në Bruksel.
Udhëheqësit e shteteve e qeverive të BE-së kërkuan shtensionim të menjëhershëm të situatës në Kosovë dhe paralajmëruan pasoja negative nëse kjo s’ndodh.
Megjithatë, pos zërave formalë për kërkesën për shtensionim, siç ka raportuar korrespodenti i KOHËS në Bruksel, Augustin Palokaj, në këtë samit, disa liderë kanë kërkuar qasje më të balancuar të BE-së.
“Do të thotë se kanë kërkuar se s’mund të paralajmërojnë apo të ndërmarrin masa vetëm ndaj Kosovës e jo edhe ndaj Serbisë. Dhe këtu disa shtete kanë thënë se pak a shumë, ndonëse pajtohen se mund të fajësohet pak më shumë pala kosovare, që atë ditë në ato ndërtesa dërgoi kryetarët në kundërshtim me sugjerimet e të gjithë ndërkombëtarëve, por për shumë pjesë të tjera fajin ka pala serbe, siç u shpreh kryeministri kroat Plenkoviq ‘u pa qartë kush i sulmoi ushtarët e KFOR-it’, prandaj është kërkuar qasje më e balancuar”, ka thënë Palokaj në emisionin “60 Minuta” në KTV.
Palokaj ka thënë se në BE presin hapa të shpejtë të tensionimit, por kanë vlerësuar se Qeveria e Kosovës ka problem me komunikim. Këtë e ka theksuar me faktin se Shtetet e Bashkuara të Amerikës dhe Mbretëria e Bashkuar kanë deklaruar se Kosova s’është koordinuar kur i ka shpallur dy organizata në veri si organizata terroriste.
