Nepal, rrëzohet një avion me 19 persona në bord

Një aeroplan që transportonte 19 persona u rrëzua në Nepal, ndërsa gjendja e tyre mbetet e panjohur, transmeton Anadolu.

Avioni që i përkiste Saurya Airlines “u rrëzua gjatë ngritjes” në Aeroportin Ndërkombëtar Tribhuvan (TIA) në kryeqytetin Katmandu, raportoi e përditshmja Kathmandu Post.

Premnath Thakur, zëdhënësi i TIA-s, tha se incidenti ndodhi rreth orës 11:00 sipas kohës lokale.

Në mesin e 19 personave ishin edhe anëtarë të ekuipazhit dhe avioni ishte nisur për në qytetin Pokhara në Nepalin qendror.

Në vendin e aksidentit po vazhdojnë operacionet e shpëtimit.