Ministria e Shëndetësisë në Gaza njoftoi sot se numri i personave të vrarë nga sulmet izraelite që nga fillimi i luftës pothuajse dyvjeçare ka arritur në të paktën 67,139, ndërsa 169,583 të tjerë janë plagosur.
Në raportin e fundit 24-orësh, ministria tha se trupat e 65 personave – përfshirë dy të gjetur së fundmi nën rrënoja – janë dërguar në spitalet e enklavës së rrethuar. Gjithashtu, 153 persona janë plagosur gjatë periudhës së fundit të raportimit.
Autoritetet paralajmëruan se shumë viktima mbeten ende nën rrënoja dhe nëpër rrugë, ku ekipet e ambulancës dhe shpëtimit nuk mund të arrijnë për shkak të bombardimeve të vazhdueshme dhe mungesës së sigurisë.
Që nga fillimi i luftës më 7 tetor 2023, Izraeli ka kryer mijëra sulme ajrore dhe tokësore në Rripin e Gazës, duke shkaktuar një krizë të thellë humanitare dhe shkatërrim masiv të infrastrukturës. /mesazhi
