Kombet e Bashkuara (OKB) bënë thirrje për “respektim të plotë të ligjit ndërkombëtar”, duke theksuar se spitalet nuk duhet të jenë në shënjestër gjatë luftimeve, pas raportimeve për një sulm ajror izraelit në portën kryesore të Spitalit Al-Shifa në qytetin e Gazës.
Në përgjigje të një pyetjeje të gazetarit të Anadolu-s nëse OKB-ja po punon në një plan për të zbatuar ligjin ndërkombëtar dhe për të parandaluar Izraelin të shënjestrojë objektet shëndetësore, zëdhënësi i OKB-së Stephane Dujarric tha: “Ne vazhdojmë të bëjmë thirrje për respektimin e plotë të ligjit ndërkombëtar, i cili përfshin pikën që spitalet nuk duhet të përdoren në asnjë pjesë të luftimit”.
Dujarric vuri në dukje se OKB-ja kishte bërë thirrje më parë për respektimin e ligjit ndërkombëtar humanitar në konfliktet e tilla si ato në Ukrainë dhe Sudan.
Kur u pyet për veprimet e OKB-së përtej thirrjes për ndalimin e armiqësive ose dënimin e brutaliteteve, Dujarric sqaroi se ai mund të flasë vetëm në emër të Sekretarit të Përgjithshëm të OKB-së.
“Ne vazhdojmë ta bëjmë këtë thirrje dhe vazhdojmë të insistojmë për këtë publikisht dhe privatisht”, tha ai, duke shtuar: “Ka pjesë të tjera legjislative në OKB, që mund të bëjnë më shumë për të siguruar përfundimin e këtij konflikti”.
Më herët gjatë ditës, një bombardim izraelit shënjestroi autoambulanca përpara portës kryesore të Spitalit Al-Shifa në qytetin e Gazës, duke rezultuar në vdekjen e të paktën 13 palestinezëve dhe plagosjen e shumë të tjerëve.
