Lëvizja Fatah, e udhëhequr nga presidenti palestinez Mahmud Abbas, njoftoi se fituan me një diferencë të madhe zgjedhjet lokale të mbajtura në Bregun Perëndimor.
Në deklaratën e Lëvizjes Fatah të publikuar në agjencinë zyrtare palestineze të lajmeve “WAFA”, thuhet se ata fituan raundin e dytë të zgjedhjeve lokale të mbajtura në Bregun Perëndimor së bashku me partnerët e tyre.
Duke theksuar se fitorja në zgjedhje është një sukses kombëtar dhe një simbol i sovranitetit mbi territoret palestineze, në deklaratë thuhet se fitorja në zgjedhjet lokale është “një hap i rëndësishëm drejt krijimit të një shteti të pavarur palestinez”.
Gjithashtu në deklaratë thuhet se mbajtja e zgjedhjeve lokale në Rripin e Gazës është penguar nga Hamasi.
Ndërkohë, anëtari i Komitetit Ekzekutiv të Organizatës për Çlirimin e Palestinës, Hussein al-Sheikh, në postimin në llogarinë e tij në Twitter, vuri në dukje se sipas rezultateve jozyrtare, Lëvizja Fatah fitoi shumicën e bashkive në Bregun Perëndimor.
Në Gaza, e cila kontrollohet nga Hamasi që nga viti 2007, raundi i parë i zgjedhjeve lokale më 11 dhjetor 2021 u bojkotua, ndërsa raundi i dytë nuk u mbajt.
Hamasi kishte vënë kusht për ” mbajtjen e zgjedhjeve gjithëpërfshirëse, duke përfshirë zgjedhjet presidenciale dhe parlamentare, dhe zgjedhjet për Asamblenë Kombëtare”, dhe për këtë arsye i bojkotoi zgjedhjet. /trt
