Ambasada e SHBA-së në Bejrut u ka bërë thirrje qytetarëve amerikanë të largohen nga Libani, derisa fluturimet komerciale janë ende të disponueshme, duke paralajmëruar se “situata e sigurisë mbetet e paqëndrueshme dhe e paparashikueshme” mes sulmeve ajrore të vazhdueshme, aktivitetit me dronë dhe zjarrit me raketa në të gjithë vendin, transmeton Anadolu.
Në një njoftim, ambasada tha se sulme janë raportuar në Libanin jugor, në rajonin Bekaa dhe në pjesë të kryeqytetit Bejrut.
“Irani dhe milicitë terroriste të lidhura me të mund të shënjestrojnë universitete në Liban. Irani ka kërcënuar në mënyrë specifike universitetet amerikane në të gjithë Lindjen e Mesme”, tha ambasada amerikane.
Ajo gjithashtu u bëri thirrje amerikanëve në Libanin jugor, zonat kufitare me Sirinë, vendbanimet e refugjatëve dhe periferitë jugore të Bejrutit që të largohen menjëherë.
Ambasada tha se qytetarët që zgjedhin të qëndrojnë duhet të përgatisin “plane emergjente” dhe të jenë të gatshëm të strehohen në vend nëse situata përkeqësohet më tej.
Ambasada njoftoi se fluturimet komerciale aktualisht operojnë përmes Middle East Airlines nga Aeroporti Ndërkombëtar Rafic Hariri i Bejrutit.
“Amerikanët duhet të marrin seriozisht në konsideratë largimin me një nga këto fluturime nëse besojnë se është e sigurt për ta bërë këtë”, shtoi ajo.
Izraeli ka goditur Libanin me sulme ajrore dhe ka nisur një ofensivë tokësore në jug që nga një sulm ndërkufitar nga Hezbollah më 2 mars.
Autoritetet libaneze kanë bërë të ditur se pothuajse 1.318 persona janë vrarë dhe 3.935 të tjerë janë plagosur nga sulmet izraelite.
