Forcat izraelite janë tërhequr mëngjesin e së dielës nga qyteti Qabatiya, në jug të Jeninit, pas dy ditësh agresioni dhe rrethimi, duke lënë pas dëme të mëdha në infrastrukturë dhe pronat e banorëve.
Kryetari i Bashkisë së Qabatiyas, Ahmed Zakarna, tha për WAFA se që në momentin e parë të hyrjes së forcave izraelite, qyteti u izolua plotësisht nga zonat përreth dhe nga qyteti i Jeninit, me vendosjen e ndalim-qarkullimit të plotë. Rrugët u bllokuan me barriera dhe u shkatërruan nga buldozerët ushtarakë, duke paralizuar jetën dhe ekonominë lokale.
Ai shtoi se gjatë ndalim-qarkullimit, ekipet e emergjencës arritën të transportonin rreth 30 pacientë në ditë drejt qendrës mjekësore të qytetit dhe spitaleve në Jenin.
Sipas Zakarna, mbyllja e fabrikave të gurit (rreth 200 punishte), tregut qendror të perimeve, fermave dhe dyqaneve ka shkaktuar humbje ekonomike që arrijnë në qindra mijëra shekelë.
Ai bëri të ditur se shumë rrugë kryesore janë shkatërruar plotësisht, ndonëse ishin asfaltuar kohët e fundit, ndërsa janë dëmtuar edhe dy transformatorë elektrikë me vlerë rreth 60 mijë shekelë secili, si dhe qindra metra kabllo elektrike.
Gjatë dy ditëve të bastisjeve, forcat izraelite hynë në rreth 50 shtëpi, gjashtë prej të cilave u shndërruan në pika ushtarake, si dhe në shkollën Izzat Abu Rab. Bastisjet u shoqëruan me dhunë, shkatërrim pronash dhe frikësim të banorëve. Rreth 50 persona u ndaluan përkohësisht, ndërsa ende mbahen të ndaluar babai dhe dy vëllezërit e të burgosurit të plagosur Ahmed Abu Rab.
Forcat izraelite kishin hyrë në Qabatiya të premten në mbrëmje me mjete ushtarake dhe buldozerë, duke vendosur snajperë mbi ndërtesa dhe trupa këmbësorie në rrugët e qytetit. /mesazhi
