Për një muaj mbi 190 milionë euro import i mallrave në Kosovë

Agjencia e Statistikave të Kosovës ka publikuar të dhënat e Tregtisë së Jashtme, lidhur me rrjedhën e importit dhe eksportin në muajin e parë të vitit 2019.

Të dhënat nga Tregtia e Jashtme në Kosovë tregojnë për një deficit tregtar më të ulët për 2.1% në muajin janar 2019, në raport me periudhën e njëjtë të vitit 2018, gjegjësisht në vlerë prej 166.9 milionë Euro, krahasuar me deficitin prej 170.5 milionë Euro në vitin 2018, raporton lajmi.net.

Eksporti mbulon importin me 12.3%.

Eksporti i mallrave në muajin janar 2019 kishte vlerën 23.4 milionë Euro, ndërsa importi kishte vlerën prej 190.4 milionë Euro, ku është një rënie prej (-4.3%) për eksport, si dhe një rënie prej (-2.4%) për import, duke krahasuar me periudhën e njëjtë të vitit 2018.

Sipas të dhënave të grupeve kryesore të eksportit: 36.8% të eksporteve e përbëjnë metalet bazë dhe artikujt prej tyre; 13.2% e përbëjnë plastika, goma dhe artikujt prej tyre; 12.2% e përbëjnë produktet minerale; 7.1% e përbëjnë makineritë, pajisjet mekanike dhe elektrike; 6.1% e përbëjnë artikujt e ndryshëm të prodhuar; 5.4% e përbëjnë ushqimet e përgatitura, pijet dhe duhani; 4.9% e përbëjnë produktet bimore etj.

Ndërsa, sipas të dhënave të grupeve kryesore për import e përbëjnë: 18.1% produktet minerale; 11.8% ushqimet e përgatitura, pijet dhe duhani; 11.4% makineritë, pajisjet mekanike dhe elektrike; 8.5%  metalet bazë dhe artikujt prej tyre; 8.5%  mjetet e transportit; 7.9% produktet e industrisë kimike; 5.5% plastika, goma dhe artikujt prej tyre etj.

Eksportet e Kosovës në vendet e BE-së arritën në 8.9 milionë Euro, ose rreth 38.0% e eksporteve të përgjithshme, me një rritje prej 40.8%. Partnerët kryesorë për eksportin e mallrave në BE janë: Gjermania (9.3%), Italia (8.5%), Holanda (5.2%), Britani e Madhe (3.9%).

Importet e Kosovës nga vendet e BE-së ishin rreth 99.2 milionë Euro, ose 52.1% e importeve të përgjithshme, me një rritje prej 55.5%. Importet me pjesëmarrje më të lartë ishin nga: Gjermania (11.7%), Sllovenia (7.3%), Greqia (6.2%), Italia (4.8%), Bullgaria (4.3%) etj.

Në muajin janar 2019, eksportet e Kosovës me vendet e CEFTA-s arritën në 7.4 milionë Euro, ose 31.9% të eksporteve të përgjithshme, me një rënie prej (-22.8%). Partnerë kryesorë për eksport nga vendet e CEFTA-s janë: Shqipëria (10.9%), Maqedonia (8.7%), Serbia (6.1%), Mali i Zi (4.9%).

Ndërsa, importet nga vendet e CEFTA-s në muajin janar 2018 arritën në 19.8 milionë Euro, ose 10.4% të importeve të përgjithshme, me një rënie prej (-46.5%). Vendet me pjesëmarrje më të lartë për import ishin: Maqedonia (5.7%), Shqipëria (3.6%) dhe Serbia (0.4 %).