Në Shqipëri vazhdojnë të mbeten aktive disa vatra zjarri, ndërkohë që autoritetet vazhdojnë operacionet për shuarjen e tyre, transmeton Anadolu.
Gjatë natës dhe në orët e fundit situata është paraqitur më problematike në Fier dhe Himarë, ku zjarret shkaktuan dëme edhe në disa banesa, ndërsa autoritetet urdhëruan evakuimin e disa familjeve.
Në një reagim në rrjetet sociale, ministri i Mbrojtjes, Ermal Nufi, ka deklaruar se në Himarë gjatë natës së kaluar Forcat e Armatosura të Shqipërisë vijuan angazhimin në terren për menaxhimin e situatës së krijuar nga zjarri.
“171 efektivë, 10 mjete në terren, 1 mjet zjarrfikës dhe 1 ambulancë nga Forcat e Armatosura ishin në gatishmëri dhe pranë komunitetit, në përballimin e situatës dhe mbrojtjen e jetës dhe pronës”, ka shkruar Nufi.
Ndërkohë, raportohet se në Himarë situata është përmirësuar dhe zjarri është vënë nën kontroll dhe po punohet për shuarjen e vatrave të mbetura aktive, edhe me ndërhyrje nga ajri.
Në javët e fundit Shqipëria është përfshirë nga zjarret që kanë shkaktuar dëme në pyje dhe zona të tjera. Sipas autoriteteve shqiptare, në orët e fundit vazhdojnë të jenë aktive disa vatra zjarri, ndërsa disa të tjera po mbahen nën monitorim.
