Të paktën 10 civilë humbën jetën dhe dhjetëra të tjerë u plagosën të premten si pasojë e sulmeve të pandërprera izraelite në disa zona të Rripit të Gazës.
Sipas burimeve mjekësore, tre persona u vranë dhe dhjetë të tjerë u plagosën kur ushtria izraelite goditi turmat e civilëve që prisnin ndihma humanitare pranë rrugës bregdetare Al-Rashid dhe kryqëzimit Al-Shuhada, në jug të qytetit të Gazës.
Forcat izraelite gjithashtu granatuan civilët në veriperëndim të qytetit të Gazës, në zonat Al-Waha dhe Al-Sudaniya, duke përdorur artileri dhe municion të gjallë, duke shkaktuar plagosje të tjera.
Katër civilë të tjerë u vranë dhe disa u plagosën pranë urës së Wadi Gazës, pasi ushtria izraelite hapi zjarr ndaj njerëzve që po prisnin për ushqim te kryqëzimi Al-Shuhada.
Ndërkohë, avionët luftarakë izraelitë kryen një seri sulmesh ajrore ndaj lagjeve të banuara në lindje të qytetit të Gazës, përfshirë Al-Zeitoun, Shuja’iyya, Al-Tuffah dhe Al-Daraj. Shtëpitë dhe pronat civile u goditën me raketa, ndërsa granatime u regjistruan edhe në skajet lindore të kampit Jabalia në veri.
Në jug, forcat izraelite bombarduan zonën përreth spitalit Nasser në Khan Yunis, duke lëshuar disa predha artilerie dhe paralajmëruar evakuimin e zonës – çka ka ngritur shqetësime për zhvendosje të detyruar të civilëve.
Dy civilë të tjerë u vranë me armë zjarri pranë një qendre ndihmash të menaxhuar nga një organizatë amerikane në veri të Rafahut, ndërsa të tjerë mbetën të plagosur.
Eksplodime të fuqishme u dëgjuan gjithashtu në lindje të Khan Yunis dhe Rafahut, ku ushtria izraelite vazhdoi të shkatërrojë shtëpitë e banorëve lokalë.
