Presidenti serb, Aleksandër Vuçiq, ka thënë se Serbia do të jetë gjithmonë pjesë e dialogut me Kosovën.
Ai para mediave serbe ka deklaruar se pjesëmarrja në dialog është në të mirë të serbëve që jetojnë në Kosovë, por se nuk ka kuptim të bisedohet me Albin Kurtin, kryeministrin e Kosovës, raporton B92.
“Kurti tha se serbët kanë kryer tre gjenocide. Dialogu është gjithashtu i rëndësishëm për shkak të sigurisë së njerëzve tanë dhe zvogëlimit të tensioneve midis serbëve dhe shqiptarëve”, ka thënë Vuçiq.
Kujtojmë se në fund të korrikut, Kryeministri i Kosovës, Albin Kurti dhe presidenti i Serbisë, Aleksandar Vuçiç janë takuar në Bruksel në kuadër të dialogut për normalizimin e marrëdhënieve mes dy shteteve, që ndërmjetësohet nga Bashkimi Evropian.
Ky ishte takimi i dytë mes Kurtit dhe Vuçiçit. Takimi i parë mes tyre u zhvillua më 15 qershor, kur procesi i dialogut, i cili u ndërpre në shtator të vitit 2020, zyrtarisht rifilloi.
