Policia nigeriane ka thënë se ka nisur një hetim pasi 31 persona vdiqën në një përplasje në qytetin jugor, Port Harcourt.
Ngjarja ka ndodhur në një fushë sporti në mëngjesin e së shtunës, ku një kishë po shpërndante ushqime për të varfërit, disa prej të cilëve kishin pritur atje gjatë natës.
“Turma u bë e trazuar dhe e pakontrollueshme dhe organizatorët nuk arritën të qetësonin situatën, ka thënë Policia.
Shumë nga ata që vdiqën në përplasje ishin gra dhe fëmijë, shkruan BBC.
Dëshmitarët i thanë agjencisë së lajmeve AFP se kishte shtyrje të furishme dhe disa u shkelën me këmbë kur njerëzit që përpiqeshin të arrinin në hyrje, u detyruan të kthehen.
“Ata po u thoshin njerëzve të ktheheshin”, tha Chisom Nwachukwu. “Disa njerëz që po shtynin nga prapa po shkelnin mbi ata njerëz”.
Në vendin e ngjarjen kanë mbërritur shërbimet e sigurisë dhe emergjencës për të vënë nën kontroll situatën. Disa nga të plagosurit po trajtohen në spitalin ushtarak të Port Harcourt.
Kisha tha se ishte e pikëlluar nga incidenti dhe po rishikonte procedura e saj të sigurisë dhe menaxhimit të turmës.
Ajo filloi bamirësinë vjetore në vitin 2014, por tha se pjesëmarrja e këtij viti ishte e paparashikuar dhe se të pranishmit filluan të mblidheshin përpara se ekipet e sigurisë për ngjarjen të ishin në vend.
Komisioneri i Policisë së shtetit të Riversit, Eboka Friday, u ka bërë thirrje grupeve fetare dhe bamirëse që të sigurohen që të punojnë me policinë për sigurinë dhe kontrollin e turmës në organizimin e programeve të tilla në të ardhmen.
Përveç hetimit të policisë, një komitet qeveritar rajonal do të formohet për të shqyrtuar rrethanat e incidentit të së shtunës, ka thnëë guvernatori i shtetit të Rivers, Nyesom Wike.
Nigeria ka parë disa tragjedi të ngjashme në vitet e fundit, duke përfshirë një program ushqimor të agjencisë së ndihmës në shtetin Borno vitin e kaluar, ku shtatë gra u shkelën për vdekje.
Port Harcourt është qendra kryesore e naftës në Nigeri, por pavarësisht nga pasuria e naftës në vend, rreth 40% e nigerianëve jetojnë nën kufirin e varfërisë. /koha
