Ministri i Jashtëm i Azerbajxhanit, Jeyhun Bayramov njoftoi sot zëvendës/sekretaren e Përgjithshme të NATO-s, Radmilla Shekerinska, mbi procesin e vazhdueshëm të normalizimit midis vendit të tij dhe Armenisë, transmeton Anadolu.
Ministria e Jashtme e Azerbajxhanit në një deklaratë tha se çështja u diskutua gjatë një takimi midis dy zyrtarëve në Baku, duke theksuar se Bayramov e informoi Shekerinskën rreth përpjekjeve diplomatike dhe masave të ndërtimit të besimit të ndërmarra për të siguruar “paqe të qëndrueshme” në rajon, si dhe projekteve rajonale të transportit dhe lidhjes.
“Gjatë takimit, u diskutua axhenda aktuale e bashkëpunimit dhe perspektivat brenda partneritetit midis Azerbajxhanit dhe NATO-s, puna e kryer në kuadër të mekanizmave të partneritetit si dhe çështjet rajonale dhe ndërkombëtare të sigurisë”, thuhet në deklaratë.
Më tej thuhet se të dyja palët vunë në dukje rëndësinë e bashkëpunimit midis Azerbajxhanit dhe NATO-s, duke theksuar se dialogu dhe bashkëveprimi që po kryhen në kuadër të partneritetit të tyre ekzistues “kontribuojnë pozitivisht në sigurinë rajonale”.
“Përvoja e vendit tonë në pjesëmarrjen në operacionet dhe misionet e mbështetjes së paqes të NATO-s, mbështetja e ngushtë për proceset në Afganistan, reformat e mbrojtjes dhe puna e bërë për të siguruar përshtatshmërinë u vlerësuan”, thuhet në deklaratë.
Gjithashtu u diskutuan mundësitë për bashkëpunim midis Azerbajxhanit dhe NATO-s në çminimin, sigurinë kibernetike dhe fusha të tjera, ndërsa u zhvillua edhe një shkëmbim pikëpamjesh mbi çështje të tjera dypalëshe dhe rajonale me interes të ndërsjellë.
NATO njoftoi të hënën se Shekerinska do të zhvillojë vizitë dy-ditore në Baku duke filluar nga e mërkura, ku do të takohet me kryetaren e Parlamentit, Sahiba Gafarova dhe Elchin Amirbayov, përfaqësuesin e presidentit Ilham Aliyev për detyra të veçanta.
