Qeveria federale e Belgjikës ka ndarë gati 30 milionë dollarë për të zgjeruar dhe riparuar rrjetet e kamerave të sigurisë të policisë në të gjithë vendin, me një pjesë të konsiderueshme të caktuar për Brukselin dhe Antwerpin, ndërsa autoritetet kërkojnë të frenojnë rritjen e krimit të lidhur me drogën, transmeton Anadolu.
Ministri i Brendshëm, Bernard Quintin tha se financimi do të forconte aftësinë e zbatimit të ligjit për të parandaluar dhe hetuar krimin, duke i përshkruar kamerat e mbikëqyrjes si një mjet kyç operativ për policinë, raportoi “VRT News”.
“Kamerat janë sytë e agjencive tona të zbatimit të ligjit. Ato bëjnë të mundur regjistrimin e incidenteve të lidhura me pasigurinë dhe mbledhjen e të dhënave thelbësore, për shembull, në luftën kundër krimeve të vogla dhe të rënda”, tha Quintin.
Sipas planit, Brukseli dhe Antwerpi do të marrin nga 8,8 milionë dollarë secili, duke përbërë 17,6 milionë dollarë të paketës totale.
Qyteti i Gentit do të marrë 1,2 milion dollarë shtesë, ndërsa qyteteve Liege, Namur, Charleroi dhe Mons do t’u ndahen secila rreth 1,2 milion dollarë.
Pjesa e mbetur prej 5,9 milionë dollarësh do të shpërndahet midis zonave të tjera policore bazuar në madhësinë e forcave të tyre.
Kamerat e blera rishtazi do të lidhen me rrjetin ekzistues të Njohjes Automatike të Targave të Belgjikës, duke u mundësuar të gjitha zonave të policisë qasje dhe ndarje të të dhënave të mbledhura
Qeveria federale po zhvillon gjithashtu një mjet të ri analitik që synon përmirësimin e zbulimit të shpejtë të automjeteve të kërkuara.
Shuma totale e ndarë është 5,9 milionë dollarë më e lartë se sa ishte planifikuar fillimisht.
