Bota e “crossover” të vegjël dhe të fortë do të bëhet pak më interesante, pasi Fiat po përgatitet të shtojë një anëtar të ri në ofertën e modeleve Grande Panda, atë që i bën nderim Pandës klasike 4×4.
Kompania italiane ka prezantuar konceptin e këtij “crossover” urban të gatshëm për terren të vështirë, i pajisur me një bosht të pasmë elektrifikuar, i cili mundëson tërheqjen në të katër rrotat.
I quajtur Fiat Grande Panda 4×4 Manifesto, koncepti debutoi gjatë një prezantimi dinamik të modelit Grande Panda Hybrid për gazetarët, i mbajtur në Itali. Nga Fiat thonë se koncepti është “shprehja më e plotë e idesë që vazhdon të evoluojë” dhe e kanë quajtur “bazë për një udhëtim emocionues”. Kjo përputhet me deklaratat e mëparshme të drejtorit të Fiat-it, Olivier Francois, i cili ka konfirmuar se versioni 4×4 i Grande Pandës është në zhvillim.
Manifesto është i lartë dhe ka disa ndryshime kyçe krahasuar me paketat më të mira të pajisjeve të Grande Pandës standarde. Karakteristikat kryesore përfshijnë mbrojtje plastike shtesë përgjatë karrocerisë, mbajtëse çatie me goma rezervë, drita LED me stil piksel në grill-in frontal dhe në çati, dhe megjithëse Fiat ka paralajmëruar më shumë shtesa për versionin prodhimtar, edhe këto tashmë i japin konceptit një transformim të vërtetë të fortë.
Fiat ka zgjedhur ngjyrën unike Bordeaux për karrocerinë si një kujtesë të butë për Pandën origjinale 4×4, e cila u shfaq për herë të parë në vitin 1983. Eksterieri përmban detaje bezhë dhe rrota çeliku 16-inç me frymëzim retro. I njëjti dizajn rrotash gjendet në paketën bazë dhe RED të Grande Pandës, megjithëse përfundimi ndryshon. Në rastin e konceptit, në rrota janë vendosur goma për të gjitha terrenet.
Manifesto ka marrë “bosht të pasmë inovativ elektrifikuar”, që mundëson tërheqjen në të katër rrotat. Kjo zgjidhje është e ngjashme me motorin elektrik të pasmë prej 29 kuaj/fuqi, i cili përdoret në Jeep Avenger 4xe dhe Alfa Romeo Junior Ibrida Q4, duke sugjeruar se Fiat përdor arkitekturë të njohur të tërheqjes.
Nga Fiat ende nuk është konfirmuar nëse boshti i pasmë elektrifikuar i konceptit është i kombinuar me motorin mild-hybrid 1.2-litërsh apo nëse edhe boshti i përparmë ka motor elektrik. Është e mundur që ky sistem AWD të jetë kompatibil me të dyja opsionet e tërheqjes.
Ende nuk ka një datë zyrtare për prezantimin e versionit prodhimtar të modelit Grande Panda 4×4, por pritet të dalë në tregun evropian në vitin 2026.
