Kandidati për kryetar bashkie në Nju Jork, Zohran Mamdani, ka plane ambicioze për qytetin: supermarkete publike, ndërtim banesash, transport urban falas dhe ngrirje qirash për banorët me subvencione.
Por gjatë fushatës për zgjedhjet paraprake të Partisë Demokrate, vëmendja u përqendrua më shumë tek qëndrimet e tij për konfliktin Izrael-Palestinë sesa tek platformat e tij politike. Mamdani është një mbrojtës i zëshëm i të drejtave të palestinezëve dhe ka denoncuar ashpër sulmet izraelite në Gaza, duke i quajtur gjenocid në përputhje me vlerësimet e disa organizatave të të drejtave të njeriut.
Pavarësisht kritikave dhe sulmeve, Mamdani nuk u tërhoq nga qëndrimet e tij – dhe fitoi. Ai arriti të mposhtte ish-guvernatorin Andrew Cuomo, i cili kishte mbështetje më të gjerë institucionale dhe financiare.
Mbështetësit e Mamdanit thonë se kjo fitore mund të shënojë një pikë kthese në politikën amerikane, duke treguar se është e mundur të fitosh zgjedhje me politika të majta dhe qëndrim të hapur në mbështetje të të drejtave palestineze. /mesazhi
