Dy supermakina Ferrari janë përfshirë në një aksident të rëndë në Itali më 4 mars 2023. Drejtuesit e dy mjeteve kanë humbur kontrollin dhe janë përplasur me një mur, duke bërë që njëra nga makinat të marrë flakë. Incidenti u kap në një video e cila u postua nga SupercarsNews.
Sipas një raportimi të Italy 24 News, aksidenti ka ndodhur rreth mesditës në Osimo, një qytet në provincën e Ankonës, Itali. Shkaku i përplasjes është ende nën hetim.
Sipas policisë lokale, aksidenti mund të jetë shkaktuar nga shpejtësia e madhe, e cila edhe mund të shihet edhe në pamjet e kamerave të sigurisë. Vlen të përmendet se policia tashmë po shqyrton pamjet e kapura nga kamerat e sigurisë, raporton Motor 1.
Në video, mund të shihni Ferrarin e kuq duke dalë nga rruga pas një kthese, e ndjekur nga afër nga Ferrari me ngjyrë blu, veturë e cila fluturoi në ajër përpara se të përplasej me gardhin e një shtëpie dhe të merrte flakë. Pjesët e të dy makinave u panë duke fluturuar teksa ndodhi përplasja, ndërsa shoferi i Ferrarit të parë u pa duke zbritur nga supermakina e kuqe pas përplasjes.
Sipas raportit, dëshmitarët kanë lajmëruar menjëherë shërbimet e urgjencës dhe në vendngjarje kanë mbërritur mjekët për të shpëtuar dy shoferët. Dy shoferët e lënduar u transportuan në spitalin Doric në Torrette. Gjendja e tyre u raportua të jetë e mirë.
Në vendngjarje kanë dalë edhe zjarrfikësit e repartit Osimo dhe termocentralit të Ankonës për të shuar zjarrin që përfshiu Ferrarin ngjyrë blu.
Raportet thanë gjithashtu se dy shoferët ishin një belg dhe një holandez – të dy ishin me pushime së bashku me miqtë në rajonin Marche. Se kush po drejtonte cilën makinë mbetet për t’u parë.
Ky incident është një mesazh mbi rëndësinë e vozitjes në mënyrë të përgjegjshme dhe pasojave të mundshme të tejkalimit të shpejtësisë. Por si një rregull i përgjithshëm, merrni parasysh që pasionin tuaj për shpejtësi të madhe ta shprehni në pistat e garave, e jo në rrugë publike, kjo për sigurinë tuaj dhe të të gjithëve.
