Huthët në Jemen pretendojnë se kanë rrëzuar një dron të armatosur zbulues turk Bayraktar Akinci, për të cilin thanë se i përkiste Arabisë Saudite dhe po kryente “misione armiqësore” mbi provincën Taiz.
Zëdhënësi ushtarak i Huthëve, Yahya Saree, tha se droni u rrëzua me përdorimin e një “arme të përshtatshme”.
Saree tha gjithashtu se grupi kishte sulmuar me raketa balistike grumbullime dhe përforcime të forcave të mbështetura nga Arabia Saudite pranë ngushticës Bab al-Mandeb.
Sipas tij, disa raketa goditën forcat në kampin Qawah në zonën Ras al-Ara, duke shkaktuar viktima dhe zjarre në depot e armëve. Ai shtoi se Huthët sulmuan gjithashtu forcat në jug të Bab al-Mandebit, si dhe në al-Saqiya dhe Ras al-Ara, duke vrarë dhe plagosur dhjetëra persona. /mesazhi
