Iraku ka pranuar 2.250 të ndaluar të lidhur me grupin terrorist Daesh nga Siria dhe ka nisur procedurat për klasifikimin e tyre sipas nivelit të rrezikshmërisë, njoftuan zyrtarë irakianë.
Kreu i Qendrës Mediatike të Sigurisë së Irakut, Saad Maan, deklaroi se transferimet janë kryer me rrugë tokësore dhe ajrore, në koordinim me koalicionin ndërkombëtar dhe pas përpjekjeve të gjera të forcave irakiane të sigurisë. Ai theksoi se autoritetet irakiane janë të përgatitura për menaxhimin e këtij procesi, duke e cilësuar atë si pjesë të përpjekjeve për uljen e rrezikut jo vetëm për Irakun, por edhe në nivel global.
Sipas Maan, ekipe të specializuara kanë nisur hetimet paraprake dhe po i klasifikojnë të ndaluarit sipas shkallës së rrezikut, ndërsa marrja e dëshmive po bëhet nën mbikëqyrje të drejtpërdrejtë gjyqësore.
Ai nuk sqaroi nëse shifra prej 2.250 personash përfaqëson një grup të ri apo numrin e përgjithshëm të të ndaluarve të pranuar që nga 21 janari, kur Komanda Qendrore e SHBA-së (CENTCOM) njoftoi fillimin e transferimeve.
Autoritetet irakiane theksuan se parimi i pandryshueshëm i Irakut është që të gjithë të përfshirët në krime kundër qytetarëve irakianë dhe të lidhur me Daesh të gjykohen nga gjykatat kompetente të vendit. Ministria e Jashtme e Irakut është në kontakt me disa shtete lidhur me të ndaluarit me shtetësi të huaj, me synim kthimin e tyre në vendet e origjinës pas përmbushjes së procedurave ligjore.
Iraku shpalli fitoren ndaj Daesh më 10 dhjetor 2017, pas një lufte trevjeçare për rimarrjen e territoreve të pushtuara. Megjithatë, qeliza të mbetura të grupit vazhdojnë të kryejnë sulme sporadike në disa rajone të vendit, ndërsa forcat e sigurisë vazhdojnë operacionet për çmontimin e tyre. /mesazhi
