Në reagimin e tij të parë publik ndaj protestave të vazhdueshme në të gjithë vendin, lideri suprem i Iranit, Ayatollah Ali Khamenei, ka deklaruar se shqetësimet e tregtarëve janë legjitime, por paralajmëroi se pas luhatjeve të fundit të monedhës qëndron një “dorë armiku”, transmeton Anadolu.
Duke folur në një tubim në Teheran, lideri iranian tha se shtresa e tregtarëve dhe dyqanxhinjve është ndër “segmentet më besnike të vendit ndaj sistemit islamik”.
Ai theksoi se protestat e fundit janë udhëhequr kryesisht nga tregtarët dhe se shqetësimet e tyre lidhur me luhatjet e vazhdueshme të monedhës kombëtare janë të justifikuara.
“Kur një tregtar i pazarit sheh gjendjen monetare të vendit, rënien e vlerës së monedhës kombëtare dhe paqëndrueshmërinë e çmimeve të valutës, vendase dhe të huaj, gjë që e bën mjedisin e biznesit të paqëndrueshëm, ai thotë ‘nuk mund të bëj biznes’. Ai thotë të vërtetën”, tha Khamenei, duke shprehur mbështetje për tregtarët.
Ai theksoi se zyrtarët qeveritarë janë “duke kërkuar të zgjidhin problemin”, por la të kuptohet se pas zhvillimeve të fundit ekziston edhe “dora e armikut”.
Khamenei tha se rritja e shpejtë dhe e pakontrolluar e çmimit të valutës së huaj, si dhe paqëndrueshmëria e saj, që i lë tregtarët të pasigurt për të ardhmen, “nuk është e natyrshme”.
“Kjo është vepër e armikut. Sigurisht që duhet ndalur. Me masa të ndryshme, si presidenti ashtu edhe krerët e degëve të tjera, si dhe zyrtarë të tjerë, po përpiqen të vënë gjërat në rregull. Prandaj, protesta e tregtarëve për këtë çështje është legjitime,” tha ai.
“Ajo që është e rëndësishme është se një grup agjentësh të provokuar dhe mercenarë të armikut qëndrojnë pas tregtarëve dhe brohorasin parulla kundër Islamit, kundër Iranit dhe kundër Republikës Islamike”, shtoi ai.
Ai tha se protestat janë të justifikuara, por theksoi se ato janë “të ndryshme nga trazirat” dhe se zyrtarët duhet të flasin me protestuesit, jo me ato që bëjnë trazira.
Lideri iranian tha se disa individë, që veprojnë me qëllim për ta bërë vendin të pasigurt, “shfrytëzojnë protestat e tregtarëve dhe krijojnë trazira”, duke i cilësuar këto veprime si “të papranueshme”.
“Duhet të njihet veprimtaria e armikut. Armiku nuk qëndron duarkryq dhe shfrytëzon çdo mundësi. Këtu panë një mundësi dhe deshën ta shfrytëzonin”, tha ai.
Irani është tronditur nga protesta të gjera javët e fundit, mes përkeqësimit të ekonomisë dhe zhvlerësimit të shpejtë të rialit, i cili ka kaluar nivelin 1.350.000 kundrejt dollarit amerikan.
Janë raportuar gjithashtu incidente dhune, me disa viktima, përfshirë protestues dhe oficerë policie në qytete të ndryshme.
Qeveria ka zhvilluar disa raunde bisedimesh me përfaqësues të tregtarëve në përpjekje për të adresuar situatën, e cila ka marrë një kthesë veçanërisht të rëndë në kryeqytetin Teheran.
Dje, presidenti i SHBA-së, Donald Trump, tha se Washingtoni do të “vijë në ndihmë” të protestuesve nëse Teherani përdor forcë vdekjeprurëse kundër tyre, një deklaratë që shkaktoi reagime të ashpra nga zyrtarë të lartë iranianë.
