Universiteti i Kolumbias në SHBA ka përjashtuar ose pezulluar rreth 80 studentë për pjesëmarrjen e tyre në protestat kundër luftës së Izraelit në Gaza. Dënimet përfshijnë përjashtime përfundimtare, pezullime nga një deri në tre vjet dhe anulim diplomash.
Vitin e kaluar, kampet protestuese të ngritura nga studentët pro-palestinezë në ambientet e universitetit u bënë qendër e një vale protestash globale në kampuse universitare. Administrata e universitetit kërkoi ndihmën e policisë për të shpërndarë protestuesit, duke çuar në dhjetëra arrestime.
“Pezullimi nga Kolumbia për të protestuar kundër gjenocidit është nderi më i madh,” deklaroi koalicioni studentor Columbia University Apartheid Divest (CUAD) në një postim në rrjetin social X.
Universiteti argumenton se studentët kanë shkelur rregullat e brendshme dhe kanë ndikuar në sigurinë dhe funksionimin normal të institucionit. Ndërkohë, protestuesit dhe mbështetësit e tyre e shohin këtë si një goditje ndaj lirisë së shprehjes dhe mbrojtjes së të drejtave të njeriut.
