Kryeministri spanjoll, Pedro Sanchez, ka bërë thirrje për unitet me “partnerët strategjikë dhe të besueshëm” për t’u përballur me qasjen proteksioniste të presidentit të SHBA-së, Donald Trump dhe “të ashtuquajturat tarifa reciproke” të tij, transmeton Anadolu.
Gjatë një forumi biznesi Spanjë-Paraguaj në kryeqytetin Asuncion, siç raporton EFE, Sanchez theksoi nevojën për t’iu përgjigjur asaj që ai e përshkroi si një luftë tregtare në zhvillim e sipër.
“Nuk mund të rrimë duarkryq përballë masave që i konsiderojmë të pabazuara dhe të padrejta”, tha Sanchez, duke iu referuar tarifave të propozuara të SHBA-së ndaj BE-së.
Ai theksoi se ndërsa shmangia e një lufte tregtare duhet të mbetet qëllimi, Evropa gjithashtu duhet të jetë e gatshme të veprojë. Ai mbrojti “Planin e Rinisjes Tregtare dhe Përgjigjes” të Spanjës, i cili u zbulua një ditë pasi administrata e Trumpit njoftoi qëllimet e saj për tarifa.
Kryeministri spanjoll propozoi që çdo e ardhur e gjeneruar nga kundërmasat e BE-së të përdoret për të krijuar një fond evropian për të mbështetur sektorët më të prekur nga tarifat e mundshme të SHBA-së.
“Për t’u përballur me rritjen e proteksionizmit, ne duhet të punojmë krah për krah me partnerë strategjikë dhe të besueshëm. Tani më shumë se kurrë, ne duhet të mbrojmë një rend shumëpalësh, të bazuar në rregulla dhe të forcojmë bashkëpunimin ndërkombëtar”, tha ai.
Ai gjithashtu e përshkroi marrëveshjen e pritur BE-Mercosur si një “moment themelor” dhe theksoi rolin e kompanive spanjolle në zhvillimin e Paraguait, duke treguar ekonominë e fortë të vendit dhe potencialin e pashfrytëzuar.
Financial Times raportoi se BE-ja dhe SHBA-të po shkojnë drejt një marrëveshjeje tregtare që do të vendosë tarifa prej 15 për qind për mallrat evropiane.
Tre burime i thanë gazetës se Brukseli dhe Washingtoni ishin afër një marrëveshjeje tarifore prej 15 për qind, të ngjashme me atë të finalizuar midis SHBA-së dhe Japonisë.
Burimet thanë se blloku mund të pranojë taksa reciproke për të shmangur rritjen e planifikuar të Trumpit në 30 për qind duke filluar nga 1 gushti.
Ata shtuan se të dyja palët mund të heqin tarifat për mallra të caktuara, të tilla si avionët, pijet alkoolike dhe pajisjet mjekësore.
