Dhjetë ditë para fillimit të zgjedhjeve presidenciale në Francë, presidenti francez Emmanuel Macron paralajmëroi se nuk ka vend për vetëkënaqësi, pasi mbështetja për të djathtën ekstreme po rritej.
“Kandidatët e ekstremit të djathtë, Marine Le Pen dhe Éric Zemmour po përparojnë me ideologjinë radikale të krahut të djathtë,” tha Macron.
Sondazhet e fundit sugjerojnë se Macron është gati për një mandat të dytë sipas parashikimeve ku ai pritet të fitojë 28% deri në 28.5% të votave në raundin e parë të votimit, përpara rivales së tij më të afërt Le Pen, e cila parashikohet të marrë 20% deri në 21% të votave.
Megjithatë, Le Pen ka fituar terren në javët e fundit të fushatës dhe po ngushton në mënyrë të vazhdueshme hendekun mes saj dhe Macron, i cili ka patur një rënie të lehtë të mbështetjes.
Duke pasur parasysh përpjekjet e tij aktuale për të gjetur një zgjidhje paqësore për luftën në Ukrainë, Macron nuk ia ka kushtuar plotësisht kohën e tij fushatës zgjedhore.
Në Francë, nëse asnjë kandidat nuk siguron shumicën absolute në raundin e parë të votimit, zhvillohet një balotazh i raundit të dytë ndërmjet dy kandidatëve që marrin më shumë vota në raundin e parë. /atsh
