Ministrat e jashtëm të vendeve arabe dhe islame i kanë bërë thirrje Iranit që të ndalë menjëherë sulmet ndaj shteteve të rajonit, duke paralajmëruar se e ardhmja e marrëdhënieve me Teheranin varet nga respektimi i sovranitetit dhe mosndërhyrja në punët e brendshme.
Në një deklaratë të përbashkët pas një takimi konsultativ në Riad, ata theksuan se veprimet e vazhdueshme të Iranit – si drejtpërdrejt ashtu edhe përmes grupeve aleate – rrezikojnë sigurinë rajonale dhe minojnë përpjekjet diplomatike.
“E ardhmja e marrëdhënieve me Iranin varet nga respektimi i sovranitetit të shteteve dhe mosndërhyrja në punët e tyre të brendshme,” thuhet në deklaratë.
Takimi mblodhi ministrat e jashtëm nga Azerbajxhani, Bahrejni, Egjipti, Jordania, Kuvajti, Libani, Pakistani, Katari, Arabia Saudite, Siria, Turqia dhe Emiratet e Bashkuara Arabe.
Ministrat dënuan ashpër sulmet që i cilësuan si të qëllimshme nga Irani me raketa balistike dhe dronë, duke theksuar se ato kanë shënjestruar infrastrukturë civile, përfshirë objekte nafte, impiante të desalinizimit, aeroporte, ndërtesa banimi dhe përfaqësi diplomatike në vendet e Gjirit dhe më gjerë.
Ata theksuan se veprime të tilla “nuk mund të justifikohen me asnjë pretekst” dhe riafirmuan të drejtën e shteteve të prekura për vetëmbrojtje, në përputhje me nenin 51 të Kartës së Kombeve të Bashkuara.
Duke bërë thirrje për ulje të menjëhershme të tensioneve, ministrat kërkuan nga Irani të respektojë të drejtën ndërkombëtare dhe parimet e fqinjësisë së mirë si hap i parë drejt stabilitetit dhe zgjidhjeve diplomatike.
Deklarata thekson gjithashtu nevojën që Irani të zbatojë Rezolutën 2817 të Këshillit të Sigurimit të OKB-së, e cila kërkon ndërprerjen e menjëhershme të sulmeve dhe ndalon mbështetjen, financimin apo armatosjen e milicive të lidhura në vendet arabe.
Në këtë kontekst përmenden edhe grupet si lëvizja Houthi në Jemen dhe Hezbollah në Liban, për të cilat disa qeveri rajonale akuzojnë Iranin për mbështetje.
Ministrat paralajmëruan gjithashtu kundër çdo kërcënimi ndaj transportit ndërkombëtar detar, duke i bërë thirrje Iranit të shmangë veprimet që mund të cenojnë lundrimin në Ngushticën e Hormuzit dhe Bab el-Mandeb.
Sa i përket Libanit, ata shprehën mbështetje për sovranitetin dhe stabilitetin e vendit, duke mbështetur përpjekjet që të gjitha armët të jenë nën kontrollin e shtetit, ndërsa dënuan edhe veprimet ushtarake të Izraelit.
Në fund, ministrat u zotuan për koordinim të vazhdueshëm për të ndjekur zhvillimet dhe për të ndërmarrë masa të nevojshme për mbrojtjen e sigurisë dhe sovranitetit të vendeve të tyre. /mesazhi
