Ministri izraelit i Mbrojtjes, Israel Katz, tha se Tel Avivi nuk është në rrugë drejt paqes me Damaskun, duke pretenduar se grupi jemenas Houthi është aktiv në Siri.
“Izraeli nuk po i afrohet paqes me Sirinë, sepse brenda kufijve të saj ka forca që mendojnë të pushtojnë qytetet e Golanit”, pretendoi Katz gjatë një seance të mbyllur të Komisionit të Punëve të Jashtme dhe Mbrojtjes në Knesset të mërkurën.
Ai pohoi se Houthit po operojnë në Siri dhe i akuzoi ata për planifikimin e një “pushtimi tokësor” të veriut të Izraelit.
“Një çështje tjetër që shqetëson zyrtarët izraelitë është komuniteti druzi në Siri,” tha ai, sipas deklaratave të publikuara nga transmetuesi publik KAN të enjten.
Ushtria izraelite është e gatshme “të ndërhyjë sërish, përfshirë edhe mbylljen e kufirit” në rast të ndonjë incidenti në jug të Sirisë, kërcënoi ai.
Nuk ka patur koment nga autoritetet siriane apo grupi Houthi mbi deklaratat e ministrit izraelit.
Autoritetet siriane kanë përsëritur vazhdimisht se garantojnë të drejta të barabarta për të gjitha komunitetet fetare në vend dhe e kanë akuzuar Izraelin se po përdor komunitetin druzi si justifikim për të ndërhyrë në punët e brendshme të Sirisë.
Në muajt e fundit, janë mbajtur takime izraelito-siriane për të arritur marrëveshje sigurie që do të siguronin tërheqjen e Izraelit nga zona neutrale siriane, e cila u pushtua në dhjetor 2024.
Pas rënies së regjimit të Bashar al-Asadit në fund të vitit 2024, Izraeli e zgjeroi pushtimin e tij në Rrafshnaltën e Golanit duke marrë nën kontroll zonën e çmilitarizuar, një veprim që shkelte Marrëveshjen e Disangazhimit të vitit 1974 me Sirinë.
Të dhënat qeveritare treguan se ushtria izraelite ka kryer mbi 1.000 sulme ajrore në Siri dhe më shumë se 400 bastisje përtej kufirit në provincat jugore që nga dhjetori 2024.
