Që nga fillmi i muajit 2019 deri në shtator 175 persona janë diagnostifikuar me kancer të mushkërive në Klinikën e Onkologjisë, në Qendrën Klinike të Kosovës.
Ndërsa, gjatë vetëm gjatë vitit 2018 janë evidentuar gjithsej 210 raste me kancer të mushkërive të të gjitha formave, shkruan Indeksonline.
Këtë e ka bërë të ditur për Indeksonline drejtor i Klinikës së Onkologjisë, Ilir Kurtishi.
E një prej shkaktarëve të shfaqjes së kësaj sëmundjeje të rëndë po del të jetë edhe ndotja e ajrit.
Sipas OBSH-së, 25 për qind e sëmundjeve të zemrës, 24 për qind e sulmeve në tru dhe 43 për qind e sëmundjeve të mushkërive dhe kancerit në mushkëri mund t’i “përshkruhen ndotjes së ajrit”.
Kurtishi, për Indeksonline ka thënë se ndotja e ajrit rrit 10 deri në 15 për qind rriskun për sëmundje malinje.
“Ndotja ndikon shumë në shfaqjen e sëmundjeve malinje e sidomos të mushkërive, gati deri 10 -15 % e rrit riskun për sëmundje malinje, bashkë me konsumimin e duhanit.
Kanceri i mushkërive trajtohet në Klinikën tonë në tq gjitha stadet e sëmundjes dhe me të gjitha forma e mjekimit bashkohor sipas protokoleve ndërkombëtare, duke filluar nga Kemioterapia, Radioterapia.
Ndërkaq mjekimi kirurgjikal bëhet në Klinikën e Kirurgjisë Torakale”, ka thënë Kurtishi për Indeksonline.
Ndryshe, Prishtina gjatë vitit të kaluar i ka prirë listës si vendi i parë me ajrin më të ndotur në botë.
Ndërsa, ende pa hyrë në stinën e dimrit, sipas matjeve të fundit të cilësisë së ajrit nga matësit e Ambasadës Amerikane në Prishtinë, cilësia e ajrit del të jetë 172, e nga matjet e ditëve të fundit, Kosova është në mesin e 10 shteteve me ajrin më të ndotur në botë.
Në bazë të të dhënave mosha më e prekur me sëmundjen e kancerit të mushkërive është ndërmjet 50-60 vjeç, kurse dominon gjinia mashkullore.
