Kryeministri izraelit Benjamin Netanyahu zhvilloi një mbledhje të kabinetit në një lagje me shumicë palestineze, në kuadër të festimeve për Ditën e Jerusalemit, duke premtuar se qyteti i lashtë do të mbetet nën sovranitetin izraelit.
“Do ta mbajmë Jerusalemin të bashkuar, të plotë dhe nën sovranitetin izraelit,” tha Netanyahu nga lagjja Silwan në Jerusalemin Lindor – zonë e pushtuar nga Izraeli gjatë luftës arabo-izraelite të vitit 1967.
Gjatë takimit, qeveria miratoi një rezolutë për të inkurajuar dhe mbështetur financiarisht vendet që vendosin ose zhvendosin ambasadat e tyre në Jerusalem, sipas një deklarate të përbashkët të ministrit të Jashtëm Gideon Saar dhe ministrit për çështjet e Jerusalemit dhe trashëgimisë hebraike, Meir Porush.
Izraeli e aneksoi Jerusalemin Lindor në vitin 1967 – një veprim që nuk njihet ndërkombëtarisht. Palestinezët e shohin Jerusalemin Lindor si kryeqytetin e shtetit të tyre të ardhshëm.
“Jerusalemi, kryeqyteti ynë i përjetshëm, u ribashkua 58 vite më parë gjatë Luftës Gjashtëditore. Ai nuk do të ndahet më kurrë,” deklaroi Netanyahu. /mesazhi
