Sipas një raportimi të Channel 12 në Izrael, sulmi i parë i Izraelit ndaj Iranit javën e kaluar, i koduar si Operacioni Narnia, përfshiu vrasjen e njëkohshme të nëntë prej dhjetë shkencëtarëve më të lartë bërthamorë të Republikës Islamike.
Shkencëtarët u vranë ndërsa flinin në shtretërit e tyre, duke përdorur një armë speciale, detajet e së cilës janë ndaluar për publikim, thuhet në raport. Shkencëtari i dhjetë u vra pak më vonë, gjithashtu gjatë operacionit që zgjati nga e enjtja në mbrëmje deri në orët e para të së premtes.
Sulmi gjithashtu përfshiu goditje ndaj programit të raketave balistike të Iranit, objektit bërthamor në Natanz, si dhe vrasjen e figurave të larta në udhëheqjen ushtarake të Iranit.
Sipas një zyrtari të lartë izraelit të cituar nga Channel 12, shkencëtarët mendonin se ishin të sigurt në shtëpitë e tyre, pasi vrasjet e mëparshme zakonisht ndodhnin gjatë lëvizjes së tyre — për shembull, kur po shkonin në punë. Për të shmangur çdo paralajmërim, Izraeli vendosi t’i eliminonte të gjithë njëkohësisht.
Channel 12 shton se Izraeli kishte ndjekur për vite me radhë këta shkencëtarë dhe kishte vendosur t’i eliminonte që në nëntor të vitit të kaluar.
Zyrtarët e inteligjencës izraelite e kanë cilësuar eliminimin e këtyre shkencëtarëve si pjesën më kritike të operacionit, duke theksuar se ndërsa pajisjet dhe udhëheqësit ushtarakë mund të zëvendësohen më lehtë, njohuritë që mbanin këta shkencëtarë janë shumë më të vështira për t’u rikuperuar. /mesazhi
