Sipas elitës ushtarake, lufta me Iranin dështoi dhe Izraeli po rrëshqet drejt pronësisë private
Një valë e paprecedentë kritikash ka shpërthyer kundër qeverisë së kryeministrit Benjamin Netanyahu, teksa tre nga figurat më autoritare të sigurisë dhe politikës izraelite kanë lëshuar akuza të rënda mbi menaxhimin e vendit.
Në prag të 78-vjetorit të krijimit të shtetit, Dan Halutz, Moshe Yaalon dhe Ehud Barak kanë thyer heshtjen përmes shkrimeve në gazetën Haaretz, duke pikturuar një panoramë dëshpëruese të realitetit aktual politik dhe ushtarak.
Ish-shefat e shtabit të ushtrisë, Dan Halutz dhe Moshe Yaalon, nuk janë kursyer në analizën e tyre të përbashkët. Ata deklaruan me hidhërim se Izraeli është “marrë peng” nga një regjim që nuk e sheh më shtetin si një institucion në shërbim të qytetarëve, por si një pasuri private.
Sipas tyre, kabineti qeveritar është krejtësisht i shkëputur nga problemet reale të popullit, duke vepruar sikur burimet e vendit t’i përkisnin familjes Netanyahu dhe rrethit të tij të ngushtë, duke përmendur specifikisht ndikimin e bashkëshortes së tij, Sarës, dhe ministres së Transportit, Miri Regev.
Yaalon, i cili përveç karrierës ushtarake ka shërbyer edhe si ministër i Mbrojtjes, theksoi se kjo formë udhëheqjeje po rrezikon themelet demokratike. Duke parë drejt zgjedhjeve të përgjithshme që priten në tetor, ata u bënë thirrje qytetarëve që të reagojnë për të rimarrë kontrollin e fatit të tyre kombëtar përpara se degradimi të jetë i pakthyeshëm.
Nga ana tjetër, ish-kryeministri Ehud Barak u fokusua te dështimet strategjike në fushëbetejë. Ndonëse pranoi se armiqtë e Izraelit pësuan goditje, ai argumentoi se asnjë nga objektivat kryesorë të luftës nuk është arritur faktikisht.
Barak shtoi se edhe regjimi në Teheran i mbijetoi sulmit të përbashkët izraelito-amerikan, pa u eliminuar kërcënimi i raketave bërthamore dhe balistike. Ai e cilësoi situatën si një “dështim të rëndë strategjik“, duke vënë në dukje se Izraeli ka humbur autonominë e tij, duke u shndërruar në një vasal të Uashingtonit.
Sipas tij, Shtëpia e Bardhë po dikton vendime vendimtare operacionale përmes direktivave që shpeshherë rezultojnë “poshtëruese” për sovranitetin izraelit. Ky tension vjen pas fushatave të përgjakshme që kanë lënë mijëra të vrarë në rajon.
Megjithëse armëpushimet e fundit të ndërmjetësuara nga SHBA-ja, kanë sjellë një qetësi të përkohshme, për kritikët e Netanyahut kjo nuk është fitore. Përkundrazi, ata e shohin si një dëshmi të mungesës së një vizioni afatgjatë, ku interesi për mbijetesë politike i kryeministrit ka marrë peng interesin kombëtar të Izraelit. /tesheshi
