Policia e Kosovës ka gjetur dy bunkerë dhe një sasi të armëve të zjarrit dhe municionit, gjatë një operacioni në Prishitnë dhe Gjilan.
Sipas komunikatës për medie, me datë 26.04.2024 njësitë përkatëse policore në bashkëpunim dhe në koordinim të detyrave sipas kompetencës, kanë realizuar një operacion policor të koduar ‘Baroni’ me urdhërese të lëshuar nga Gjykata Themelore-Prishtinë, ku janë kontrolluar 5 (pesë) shtëpi banimi në rajonin e Prishtinës dhe një vilë (shtëpi mali) në fshatin Makresh-Gjilan.
“Kontrollet e realizuara në këto lokacione kanë rezultuar me gjetjen e:
• 2 (dy) Bunkerë (vende të fshehta, të modifikuara në mënyrë shumë profesionale për fshehjen e gjërave ilegale),
• Armë automatike, një karikator dhe 31 fishekë,
• Armë zjarri, një karikator dhe 17 fishekë,
• Arme e gjuetisë, një karikator dhe 6 fishekë.
• Armë zjarri, një karikator dhe 7 fishekë”, thuhet në komunikatë.
Sipas njoftimit policor, në vendngjarje ka dalë njësia e teknikës kriminalistike dhe forenzikës e cila ka bërë fotografimin dhe konfiskimin e të gjitha dëshmive të gjetura si prova materiale.
Lidhur me rastin dy personat e dyshuar meshkuj kosovarë janë shoqëruar në zyrat e DHTN-së Prishtinë për inicim të rastit dhe në konsultim me prokurorin kompetent me urdhër të tij, të dyshuarit pas intervistimit janë dërguar në qendrën e mbajtjes për 48-orë, teksa i dyshuari i tretë ndodhet në arrati.
