Presidenti i Irlandës, Michael D. Higgins, ka bërë thirrje për një reagim urgjent ndërkombëtar për të ndaluar krizën humanitare në Gaza, ku, sipas Komisionerit të Përgjithshëm të UNRWA-së, uria është e pashmangshme.
Duke folur pas një ceremonie ndarjeje çmimesh në Konferencën e Shoqatës Irlandeze për Edukimin për Zhvillim (IDEA), ku ai u nderua me çmimin e parë “Zëri Global për Njerëzimin”, Presidenti Higgins përshëndeti mocionin e miratuar nga Dáil Éireann (parlamenti irlandez), që kërkon një Sesion Special Emergjent të Asamblesë së Përgjithshme të OKB-së për të adresuar situatën në Gaza.
Presidenti theksoi se shpërndarja e ndihmave në Gaza është penguar nga një sistem i ri i pasuksesshëm, të cilin e cilësoi si “humbje burimesh dhe shpërqendrim nga mizoritë”, ndërkohë që ekziston një sistem funksional humanitar që mund të përdoret menjëherë.
Duke cituar zyrtarët e OKB-së, ai shtoi se nuk ka më kohë për të humbur: “Asnjë vend nuk mund të kthejë shikimin mënjanë. Uji i pastër, ushqimi dhe barnat duhet të hyjnë në Gaza tani, në shkallë të gjerë.”
Presidenti irlandez vlerësoi pozicionin e vendit të tij si lider në këtë kauzë, por theksoi se duhet të ketë një përgjigje reale nga komuniteti ndërkombëtar dhe BE-ja: “Ka një detyrim moral kolektiv për të ndërhyrë dhe për të ndalur këtë tragjedi njerëzore.” /mesazhi
