Një plan i detajuar i publikuar nga Fondacioni konservator Heritage në Shtetet e Bashkuara, i njohur si “Projekti Esther”, ka ngritur shqetësime serioze në lidhje me lirinë e shprehjes dhe të drejtën për protesta në vend. Plani synon të godasë dhe çmontojë infrastrukturën e mbështetjes për kauzën palestineze në SHBA, duke e etiketuar si pjesë të një rrjeti të quajtur “Rrjeti Mbështetës i Hamasit”.
Sipas dokumentit, masa të ashpra ligjore përfshijnë ndjekje penale kundër aktivistëve dhe organizatave, deportimin e studentëve ndërkombëtarë, pezullimin e vizave dhe kontrolle financiare ndaj OJQ-ve dhe universiteteve që mbështesin të drejtat e palestinezëve.
Shumë grupe të të drejtave civile dhe akademikë kanë paralajmëruar se plani është një sulm i drejtpërdrejtë ndaj lirisë së fjalës dhe një përpjekje për të heshtur çdo kritikë ndaj politikave të Izraelit. Disa e krahasojnë me epokën e McCarthy-t, kur në SHBA u nis një fushatë e gjerë kundër zërave të majtë dhe kritikëve të sistemit.
Ndërkohë, administrata Trump ka filluar të zbatojë disa nga rekomandimet e Projektit Esther, duke arrestuar protestues pro-Palestinë dhe duke kërcënuar universitetet me ndërprerje fondesh, çka ka shkaktuar reagime të ashpra nga komunitetet akademike dhe organizatat ndërkombëtare të të drejtave të njeriut. /mesazhi
