Testi Shtetëror i Maturës dhe Testi i Arritshmërisë në Kosovë, si formë e vlerësimit të matjes së njohurive të nxënësve, vazhdimisht po përcillet me parregullsi. Nxënësit arrijnë të kopjojnë, madje shpesh ndodh që testi të shpërndahet edhe nëpër rrjete sociale.
Këto teste, kanë nevojë për administrim më të mirë, në mënyrë që të sjellë rezultate të sakta, thonë ekspertë për çështje të arsimit, por edhe vetë nxënësit.
Testit të Maturës dhe atij të Arritshmërisë çdo vit i nënshtrohen nxënësit që përfundojnë klasën e 12-të, të arsimit të lartë, respektivisht nxënësit e klasës se 9-të, të arsimit të mesëm.
Përfundimi me sukses i këtij testi mundëson më pas aplikimin për studime në universitet, respektivisht në shkollë të mesme.
Nxënësi Omer Halili ka përfunduar klasën e nëntë të shkollës fillore dhe ka kaluar Testin e Arritshmërisë. Ai thotë se gjatë mbajtjes së testit nuk janë vërejtur parregullsi, por ato kanë dalë në sipërfaqe pas shpalljeve të rezultateve.
