SHBA heq shkrimet e Detit të Vdekur: Rezultatet treguan se ishin false

Një muze amerikan ka hequr nga ekspozimi fragmente të asaj që besohej se ishin pjesë të shkrimeve të Detit të Vdekur, pasi testet treguan se ato ishin false.

Muzeu i Biblës në Uashington dërgoi 5 nga 16 fragmentet e tij për analiza në Gjermani. Por, “rezultatet treguan karakteristika që nuk përputhen me origjinën e lashtë”, njoftoi muzeu.

Pasi kushtoi 600 milionë dollarë, muzeu u hap nga miliarderi evangjelist Steve Green në vitin 2017.

Shkrimet e Detit të Vdekur janë një seri dorëshkrimesh të lashta të Biblës hebreje. Shkrimet e para u gjetën në shpella, në Qumran, në bregun perëndimor të Detit të Vdekur në vitin 1947.

Ato raportohet se u zbuluan nga një bari i ri, beduin, që po kërkonte delet e tij të humbura. Testet u urdhëruan pasi disa studiues të Biblës, që ekzaminuan 13 nga fragmentet e muzeut që më parë nuk ishte shqyrtuar, thanë se kishte shumë gjasa që një numër prej tyre të ishin falsifikime moderne.

Drejtuesit e muzeut thanë se kishin shpresuar që testimi të nxirrte rezultate të tjera, sidoqoftë, kjo sipas tyre është një mundësi për të edukuar publikun mbi rëndësinë e verifikimit të autenticitetit të artifakteve të rralla biblike, procesin testues dhe angazhimin për të qenë transparent.

Kjo, sidoqoftë, nuk është hera e parë që pronarët e muzeut përballen me telashe. Vitin e shkuar, kompania e Green pagoi 3 milionë dollarë gjobë dhe ktheu me mijëra sende, pasi Departamenti amerikan i Drejtësisë e akuzoi atë se kishte kontrabanduar artefakte nga Iraku.