Shefi i agjencisë bërthamore të OKB-së, Rafael Grossi, ka paralajmëruar se “nuk ka shumë kohë” për arritjen e një marrëveshjeje mes Iranit dhe Shteteve të Bashkuara, ndonëse ka vlerësuar se bisedimet e ndërmjetësuara nga Omani në Gjenevë përbëjnë “një hap përpara”.
Grossi, i cili drejton Agjencinë Ndërkombëtare për Energjinë Atomike, deklaroi për televizionin francez se dialogu ka nisur të marrë formë, por theksoi se negociatat mbeten jashtëzakonisht komplekse.
“Ekziston mundësia e një dialogu që, për herë të parë, po fillon të marrë formë reale. Po nisim të flasim për gjëra konkrete”, u shpreh ai.
Megjithatë, Teherani vazhdon të pezullojë një pjesë të bashkëpunimit me agjencinë, duke mos lejuar inspektorët të kenë qasje në disa objekte që u shënjestruan nga sulmet izraelite dhe amerikane gjatë konfliktit 12-ditor të qershorit të kaluar.
Rritje masive e pranisë ushtarake amerikane
Paralelisht me përpjekjet diplomatike, SHBA-ja ka shtuar ndjeshëm praninë ushtarake në Lindjen e Mesme, duke krijuar një situatë të tensionuar në rajon.
Aktualisht, Uashingtoni ka 13 anije luftarake në zonë, përfshirë aeroplanmbajtësen USS Abraham Lincoln. Aeroplanmbajtësja më e madhe në botë, USS Gerald R. Ford, është nisur për t’iu bashkuar flotës, e shoqëruar nga tre shkatërrues.
Është e rrallë që dy aeroplanmbajtëse amerikane të operojnë njëkohësisht në Lindjen e Mesme – një situatë e ngjashme u pa gjatë sulmeve ndaj objekteve bërthamore iraniane vitin e kaluar.
Shtëpia e Bardhë ka vijuar presionin ndaj Teheranit. Zëdhënësja për shtyp, Karoline Leavitt, deklaroi se Irani do të ishte “shumë i mençur” nëse do të arrinte një marrëveshje. Sipas saj, ndonëse ka “pak progres”, ekzistojnë ende “shumë arsye dhe argumente” që mund të justifikojnë një sulm kundër Iranit.
Sipas burimeve të inteligjencës me qasje të hapur, SHBA-ja ka dislokuar gjithashtu një numër të madh avionësh luftarakë në rajon, përfshirë avionët stealth F-22 Raptor dhe avionë furnizimi me karburant KC-135, për të mbështetur operacione të mundshme ushtarake.
Presidenti Donald Trump e kishte urdhëruar fillimisht këtë rritje të forcave si përgjigje ndaj goditjes së protestave në Iran në muajin janar. Edhe pse muajin e kaluar u tërhoq nga urdhri për sulme, pasi Teherani ndaloi disa qindra ekzekutime, ai së fundmi ka rifreskuar kërcënimet, duke këmbëngulur për një marrëveshje të re që do të zëvendësonte plotësisht paktin bërthamor të vitit 2018. /mesazhi
