Ministri i Mbrojtjes i Somalisë, Ahmed Moalim Fiqi, ka deklaruar se Izraeli po planifikon zhvendosjen me forcë të palestinezëve nga Gaza drejt Somalilandit, duke e cilësuar këtë si një shkelje serioze të së drejtës ndërkombëtare.
Në një intervistë për Al Jazeera, Fiqi tha se Somalia disponon “informacion të konfirmuar” mbi një plan izraelit për transferimin e palestinezëve në rajonin separatist të Somalilandit, i cili shpalli pavarësinë nga Somalia në vitin 1991, por nuk njihet nga OKB-ja. Akuzat vijnë në një kohë kur Izraeli, në dhjetor, u bë vendi i parë që njohu Somalilandin si shtet të pavarur.
Izraeli dhe autoritetet e Somalilandit i kanë mohuar më herët raportimet për një marrëveshje të tillë. Ministri i Jashtëm izraelit, Gideon Saar, deklaroi se zhvendosja e palestinezëve “nuk është pjesë e marrëveshjes”, pa dhënë detaje të mëtejshme. Edhe burime pranë qeverisë së Somalilandit kanë mohuar se kjo ka qenë një kusht i pranimit të njohjes nga Izraeli.
Megjithatë, presidenti i Somalisë, Hassan Sheikh Mohamud, ka pohuar më herët se Somaliland ka pranuar kushte që përfshijnë vendosjen e palestinezëve, krijimin e një baze ushtarake izraelite në brigjet e Gjirit të Adenit dhe normalizimin e marrëdhënieve me Izraelin në kuadër të Marrëveshjeve të Abrahamit.
Fiqi i bëri thirrje kryeministrit izraelit Benjamin Netanyahu të tërheqë njohjen diplomatike të Somalilandit, duke e cilësuar atë si një sulm të drejtpërdrejtë ndaj sovranitetit të Somalisë. Ai akuzoi Izraelin se ndjek një strategji afatgjatë për fragmentimin e shteteve në rajon, duke e lidhur njohjen e Somalilandit me këtë qasje. /mesazhi
